Accident News: भयंकर अपघात! दुचाकी समोरासमोर धडकल्या, पती-पत्नीसह तिघांचा जागीच मृत्यू

मनोज जयस्वाल, साम टीव्ही

वाशिम जिल्ह्यात अतिशय हृदयद्रावक घटना घडली आहे. दोन दुचाकींची एकमेकांवर धडक झाला आणि त्यामध्ये तिघांचा जागीचा मृत्यू झाला आहे. एक जण गंभीर झाला आहे. यामुळे घटनेने एकच खळबळ उडाली आहे. वाशिम जिल्ह्यातील मालेगाव तालुक्यातील जऊळका गावाजवळ छत्रपती संभाजीनगर–नागपूर या जुन्या महामार्गावर दोन दुचाकींची समोरासमोर भीषण धडक होऊन तिघांचा जागीच मृत्यू झाला असून एक जण गंभीर जखमी झाला आहे. ही घटना गुरुवारी सकाळी घडली.

मृतांमध्ये सदाशिव राठोड आणि त्यांची पत्नी सरलाबाई राठोड (रा. गिरडा, ता. मानोरा, जि. वाशिम) तसेच कृष्णा नंदू भोकरे (वय ३०, रा. सावरखेड, ता. पातूर, जि. अकोला) यांचा समावेश आहे. तर कृष्णाचा साथीदार राजू लठाड (वय २७, रा. कोळदरा) गंभीर जखमी असून, त्याला तातडीने वाशिम जिल्हा रुग्णालयात उपचारासाठी दाखल करण्यात आले आहे.

याबाबत अधिक माहिती अशी की, कृष्णा भोकरे आणि राजू लठाड हे दुचाकीवरून नागपूर-संभाजीनगर महामार्गाने शेलुबाजारकडे जात होते. दरम्यान, सदाशिव राठोड आणि त्यांची पत्नी सरलाबाई हे पती-पत्नी मुंबईकडे निघाले होते. जऊळका रेल्वे स्थानकापासून काही अंतरावर चैत्रबन धाब्याजवळ दोन्ही दुचाकींची समोरासमोर जोरदार धडक झाली.

अपघात एवढा भीषण होता की दोन्ही दुचाकींचे अक्षरशः चुराडे झाले. सर्वत्र रस्त्यावर तिघांचे मृतदेह पडले होते आणि रक्ताच्या थारोळ्यात पडले होते. सदर घटनेची माहिती मिळताच पोलिसांनी तातडीने घटनास्थळी धाव घेतली आणि जखमीला रुग्णालयात दाखल केले. या अपघातामुळे परिसरात हळहळ व्यक्त केली जात आहे.