अंबाजोगाईच्या स्वाराती रुग्णालयाचा होणार कायापालट; 15 कोटी मंजूर

बीड : बीड जिल्ह्यातील महत्त्वाचे समजल्या जाणाऱ्या, अंबाजोगाईच्या स्वाराती रुग्णालयाचा आता कायापालट होणार आहे. रुग्णालय विस्तारीकरणासाठी शासनाने तब्बल 15 कोटी रुपयांच्या निधीला मंजुरी दिली आहे.

हे देखील पाहा :

स्वामी रामानंद तीर्थ हे बीड जिल्ह्यातील एकमेव शासकीय वैद्यकीय महाविद्यालय असून, येथील रुग्णालयात आरोग्यविषयक सर्व सुविधा उपलब्ध असाव्यात, कोणत्याही प्रकारच्या आजारावर इथे उपचार मिळावेत व यासाठी आवश्यक यंत्र सामग्री व तज्ञ डॉक्टर्स इथेच उपलब्ध व्हावेत यासाठी बीडचे पालकमंत्री धनंजय मुंडे प्रयत्न करत आहेत.

तर, आज निर्गमित करण्यात आलेल्या शासन निर्णयाप्रमाणे रुग्णालयात नव्याने बांधण्यात आलेल्या 230 खाटांच्या इमारतीमध्ये, वरती एक मजल्याचे बांधकाम करण्यात येणार असून तेथे आणखी 6 वॉर्ड, 4 ऑपरेशन थिएटर तसेच 4 विभाग उभारण्यात येणार आहेत. यासाठी 14 कोटी 99 लाख 39 हजार रुपये खर्चास वैद्यकीय शिक्षण मंत्रालयाने प्रशासकीय मान्यता प्रदान केली आहे. दरम्यान यामुळे आता बीड जिल्ह्यातील सर्वसामान्य रुग्णांना चांगली सेवा मिळणार असून या रुग्णालय विस्तारीकरणाचा नागरिकांना मोठा फायदा होणार आहे.

Edited By : Krushnarav Sathe