Swapnil Deshmukh Case: संतोष देशमुखांनी भावाच्या मृत्यूचा बदला घेतला, त्याच झाडाखाली मारेकऱ्याला संपवलं

योगेश काशिद, बीड

बीडमध्ये स्वप्निल उर्फ बबलू देशमुख या तरुणाची हत्या करण्यात आली आहे. संतोष देशमुखांनी आपल्या भावाच्या मृत्यूचा बदला घेतला. ज्या झाडाखाली भावाने आत्महत्या केली त्या झाडाखालीच त्यांनी भावाच्या मारेकऱ्याची निर्घृण हत्या करत त्याला संपवलं. या हत्याप्रकरणी ७ जणांविरोधात शिरसाळा पोलिस ठाण्यात गुन्हा दाखल करण्यात आला आहे. पोलिसांनी ३ जणांना अटक केली आहे.

बीडच्या धारूर तालुक्यातील कानपूर गावामध्ये ही घटना घडली. हे गाव शिरसाळा पोलिस ठाण्याच्या हद्दीत येते. कान्हापूरजवळ जुन्या वादातून स्वप्निल उर्फ बबलू देशमुख या तरुणाची गावातीलच संतोष देशमुख, त्याची पत्नी सोनाली देशमुख आणि इतर काह जणांनी धारदार शस्त्राने वार करत हत्या केली. ही हत्या जुन्या वादातून झाली.

कान्हापूर गावात स्वप्निल उर्फ बबलू देशमुखच्या त्रासाला कंटाळून गावामधील किराणा दुकानदार अविनाश देशमुखने मार्च २०२३ मध्ये गळफास घेऊन आत्महत्या केली होती. या प्रकरणी स्वप्निल देशमुखवर गुन्हा दाखल करण्यात आला होता. हा गुन्हा मागे घ्या यासाठी स्वप्निल देशमुख वारंवार अविनाश देशमुखच्या कुटुंबियांना धमकावत होता. याच रागातून अविनाश देशमुखचा भाऊ संतोष देशमुख आणि त्याची पत्नी सोनाली देशमुख आणि इतर आरोपींनी स्वप्नील देशमुखची हत्या केली.

धारधार शस्त्रांनी वार करत स्वप्निलची हत्या करण्यात आली. महत्वाचे म्हणजे ज्याठिकाणी संतोष देशमुखच्या भावाने म्हणजे अविनाशने आत्महत्या केली. त्याचठिकाणी स्वप्निलची हत्या करण्यात आली. याप्रकरणी शिरसाळा पोलिस ठाण्यामध्ये ७ आरोपींविरोधात गुन्हा दाखल करण्यात आला आहे. त्यापैकी ३ आरोपींना पोलिसांनी अटक केली. त्यांना आता पुढील कारवाईसाठी न्यायालयामध्ये हजर करण्यात येणार आहे. बीड जिल्ह्यामध्ये वारंवार घडणाऱ्या खुनाच्या घटना यामुळे बीड जिल्ह्यामध्ये कायदा आणि सुव्यवस्था राहिली आहे का? गुन्हेगारांना पोलिसांचा धाक राहिला आहे की नाही? असे प्रश्न उपस्थित केले जाऊ लागले आहेत.