Nashik Accident: भरधाव ट्रकची स्कुटीला धडक, ट्यूशनवरून घरी जाणाऱ्या विद्यार्थिनीचा मृत्यू; भावाच्या डोळ्यादेखत सोडले प्राण

अजय सोनावणे, नाशिक

नाशिकमध्ये भीषण रस्ते अपघातामध्ये विद्यार्थिनीचा मृत्यू झाल्याची घटना समोर आली. नाशिकच्या सटाणा-मालेगाव रस्त्यावर हा अपघात झाला. भरधाव ट्रकने स्कूटीला धडक दिली. या अपघातामध्ये विद्यार्थिनीचा मृत्यू झाला तर तिचा भाऊ जखमी झाला. या अपघातानंतर घटनास्थळी तणावाचे वातावरण होते. जखमी मुलाला उपचारासाठी रुग्णालयात दाखल करण्यात आले आहे. नाशिक पोलिस या अपघाताचा तपास करत आहेत.

मिळालेल्या माहितीनुसार, नाशिकच्या सटाणा-मालेगाव रस्त्यावर असलेल्या कृषी उत्पन्न बाजार समितीसमोर आज दुपारच्या सुमारास हा अपघात झाला. ट्रक आणि स्कूटी यांच्यात भीषण अपघात झाला. अपघातामध्ये स्कूटीवरून जाणाऱ्या विद्यार्थिनीचा मृत्यू झाला तर तिचा भाऊ जखमी झाला. ही विद्यार्थिनी अजमीर सौंदाणे येथे राहत होती. मोक्षदा जगदीश बधान (वय १७ वर्षे) असं या मृत विद्यार्थिनीचे नाव होते.

मोक्षदा ही सटाण्याहून क्लास करुन आजमेर सौदाणे येथे आपल्या भावासोबत स्कूटीवरून घरी जात होती त्यावेळी ही भयंकर घटना घडली. तिच्या स्कूटीला भरधाव ट्रकने धडक दिली. ट्रकच्या धडकेत मोक्षदा ट्रकच्या मागच्या चाकाखाली आली आणि तिचा जागीच मृत्यू झाला. तिचा भाऊ कृष्णा याच्या पायाला किरकोळ दुखापत झाली असून त्याच्यावर स्थानिक रुग्णालयात उपचार सुरू आहेत.

या अपघाताची माहिती मिळताच सटाणा पोलिस ठाण्याचे अधिकारी आणि कर्मचारी तात्काळ घटनास्थळी पोहोचले. त्यांनी अपघातस्थळी पंचनामा केला आणि रस्त्यावर निर्माण झालेली वाहतूक कोंडी नियंत्रणात आणत मार्ग मोकळा केला. पोलिसांनी मोक्षदाचा मृतदेह ताब्यात घेऊन शवविच्छेदनासाठी रुग्णालयात पाठवला.