Solapur Crime : जेवत नाही, शाळेत जात नाही म्हणून राग; सावत्र आईने ३ वर्षांच्या चिमुकलीला संपवलं

विश्वभूषण लिमये, साम टीव्ही, प्रतिनिधी

Solapur : सोलापूरमधून एक खळबळजनक घटना उघडकीस आली आहे. सोलापूर जिल्ह्याच्या मोहोळ तालुक्यातील वडवळ येथे एका महिलेने तिच्या सावत्र मुलीची गळा दाबून हत्या केली. गेल्या काही वर्षांपासून आरोपी महिला तिच्या सावत्र मुलींचा सतत छळ करत होती अशी माहिती समोर आली आहे. या प्रकरणामुळे परिसरात मोठी खळबळ उडाली आहे.

जेवण करत नाही, शाळेत जात नाही अशा शुल्लक कारणांवरुन तीन वर्षांच्या चिमुकलीची तिच्या सावत्र आईने हत्या केल्याचा आरोप होत आहे. मुलीची हत्या केल्याप्रकरणी पोलिसांनी सावत्र आईला अटक केली आहे. शुक्रवारी (१ ऑगस्ट) सकाळी साडेदहाच्या सुमारास महिलेने राग अनावर न झाल्याने मुलीला संपवले.

पोलिसांनी दिलेल्या माहितीनुसार, वडवळ स्टॉप येथे महिला तिचा पती आणि पतीच्या पहिल्या पत्नीच्या दोन मुलींसह एका भाड्याच्या घरात राहत होती. आरोपी महिला तिच्या दोन्ही मुलींना शुल्लक कारणांवरुन अमानुष मारहाण करत होती. जेवण न करणे किंवा शाळेत न जाणे यांसारख्या छोट्या कारणांवरुन मुलींचा छळ सुरु होता.

काल (१ ऑगस्ट) महिलेचा राग अनावर झाला. महिलेने तिच्या ३ वर्षीय सावत्र मुलीचा गळा दाबून तिची हत्या केली. या प्रकरणी महिला पोलीस कर्मचारी अश्विनी घोलप यांनी दिलेल्या फिर्यादीनंतर मोहोळ पोलीस ठाण्यामध्ये महिलेच्या विरोधात खुनाचा गुन्हा दाखल करण्यात आला आहे. ३ वर्षांच्या चिमुकलीच्या हत्येमुळे हळहळ व्यक्त केली जात आहे.