Crime News : दुचाकीवरून आले, तरुणीला उचलून नेलं अन्...; धक्कादायक कारण आलं समोर, घटनेचा VIDEO व्हायरल

नांदेड शहरातील रेल्वे स्थानक परिसरात भरदिवसा एका तरुणीला जबरदस्तीने उचलून नेल्याची धक्कादायक घटना घडली. या घटनेचा व्हिडिओ सोशल मीडियावर मोठ्या प्रमाणात व्हायरल झाल्यानंतर पोलिसांनी तात्काळ कारवाई करत काही तासांतच या प्रकरणाचा छडा लावला. आणि अपहरण केलेल्या तरुणीची सुखरूप सुटका केली. पोलिसांनी याप्रकरणातील एका आरोपी तरुणाला ताब्यात घेतले असून दुसऱ्यालाही लवकरच अटक करण्यात येणार असल्याची माहिती पोलीस अधीक्षक अभिनाश कुमार यांनी दिली.

मिळालेल्या माहितीनुसार, अपहरण झालेली तरुणी मागील सहा महिन्यांपासून नांदेड रेल्वे स्थानक परिसरात वास्तव्य करत होती आणि परिसरातच भिक मागून पोट भरत होती. या तरुणीची ओळख आरोपी तरुणांपैकी एकाशी पूर्वीपासूनच होती. तो तरुण तिला भेटण्यासाठी रेल्वे स्टेशन परिसरात आला असता त्यांच्यात वाद झाला. हा वाद विकोपाला जाऊन संबंधित तरुणाने आपल्या मित्राच्या मदतीने दुचाकीवरून तिला जबरदस्तीने उचलून नेले.

ही संपूर्ण घटना आजूबाजूला असलेल्या काही नागरिकांपैकी एकाने आपल्या मोबाईलमध्ये चित्रित केली. हा व्हिडिओ सोशल मीडियावर झपाट्याने व्हायरल झाल्यानंतर पोलिसांनी तत्काळ नाकाबंदी केली. काही वेळातच पोलिसांनी या तरुणीचा ठावठिकाणा लावून तिची सुखरूप सुटका केली. प्रकरणाची गंभीरता ओळखून पोलिसांनी त्वरीत कारवाई करत आरोपीला अटक केली असून दुसरा आरोपी पसार आहे. त्याचा शोध सुरू असल्याचे अधिकाऱ्यांनी सांगितले.

पोलिसांनी दिलेल्या प्राथमिक माहितीनुसार, अपहरणामागे कुठलाही मोठा गुन्हेगारी उद्देश नाही, परंतु सार्वजनिक ठिकाणी आणि भरदिवसा घडलेला हा प्रकार अत्यंत गंभीर असून या घटनेमुळे शहरात खळबळ उडाली आहे.