कोकणी माणूस तुम्हाला तुमची जागा दाखवल्याशिवाय राहणार नाही - शालिनी ठाकरे

चिपळूण - अतिवृष्टीमुळे पुर आणि दरड कोसळल्यामुळे चिपळूण (chiplun) शहर उध्वस्त झाले आहे. मोठ्या प्रमाणात जीवीतहानी आणि आर्थिक नुकसान झाले आहे. मुख्यमंत्री उद्धव ठाकरे (CM Uddhav Thackeray) यांनी काल चिपळूणचा पाहणी दौरा केला. या दौऱ्यात शिवसेनेचे स्थानिक आमदार भास्कर जाधवही (MLA Bhaskar Jadhav) सहभागी झाले होते. पुरग्रस्तांशी संवाद साधत असताना एका महिलेने मुख्यमंत्र्याकडे आपली व्यथा मांडत मदत मागितली. (shalini thackeray slams to bhaskar jadhav about misbehaving with women)

‘‘पुराचे पाणी माझ्या घराच्या छतापर्यंत पोहोचले. त्यात सर्वकाही वाहून गेले. तुम्ही काहीही करा, आमदार - खासदारांचे दोन महीन्यांचे पगार रद्द करा, पण आम्हाला मदत करा. मदत केल्याशिवाय जाऊ नका हो’' असा हंबरडा फोडत त्या महीलेने मुख्यमंत्र्याकडे मदत मागितली. मुख्यमंत्री शातपणे ऐकत होते आणि त्यांनी मदतीचे आश्वासनही दिले. मात्र अचानक आमदार भास्कर जाधव हे त्या महिलेला म्हणाले की, “आमदार खासदारांनी सहा महिन्याचा पगार दिला तरी काय होणार नाय, तुझा मुलगा कुठंय? तुझ्या आईला समजव. उद्या भेट,” अशी प्रतिक्रिया दिली.

हे देखील पहा -

हा व्हिडिओ व्हायरल झाला आहे. विरोधकांनी सरकार खासकरुन शिवसेनेला (Shivsena) धारेवर धरलं आहे. महाराष्ट्र नवनिर्माण सेनेच्या सरचिटणीस शालिनी ठाकरे (MNS Leader Shalini Thackeray) देखील भास्कर जाधवांवर कडाडून टीका केली आहे. “भास्कर जाधव, आज त्या अगतिक महिलेवर जो हात उघारलाय ना…? तोच हात पुढच्या पाच वर्षांनी जोडून जेव्हा मतं मागायला याल, तेव्हा हाच कोकणी माणूस तुम्हाला तुमची जागा दाखवल्याशिवाय राहणार नाही,” असा इशारा त्यांनी भास्कर जाधवांना दिला.

Edited By - Akshay Baisane