Sanjay Raut Tweet: BBC वर IT चे छापे, संजय राऊत भडकले; 'रक्ताच्या शेवटच्या थेंबापर्यंत...'

Sanjay Raut Tweet On BBC: बीबीसी कार्यालयावर प्राप्तिकर विभागाने छापेमारी केली आहे. सूत्रांनी दिलेल्या माहितीनुसार बीबीसीच्या कार्यालयातील सर्व कर्मचाऱ्यांचे फोन देखील जप्त करण्यात आले आहेत. आयटीच्या या कारवाईनंतर शिवसेना नेते संजय राऊत यांनी संताप व्यक्त केला आहे. तसेच भारतीय लोकशाही डागाळत असल्याचे म्हणत त्यांनी केंद्र सरकारवर देखील टीका केली आहे.

संजय राऊत यांनी ट्वीटमध्ये म्हटले की, "बीबीसीवरील छापेमारीची वेळ बघितली तर जास्त काही सांगायची गरज नाही. भारत आपली लोकशाही प्रतिमा वेगानं गमावतोय हेच यातून प्रतीत होतंय. भारताची लोकशाही धोक्यात आहे. न्यायव्यवस्था आणि पत्रकारिता हे दोन शेवटचे गड शाबूत आहेत. आम्ही भारताच्या लोकशाहीसाठी रक्ताच्या शेवटच्या थेंबापर्यंत लढू. जय हिंद!!"

बीबीसीवरील आयकर विभागाच्या धाडीबाबत काँग्रेसने देखील तिखट शब्दात प्रतिक्रिया व्यक्त केली आहे. काँग्रेसने अधिकृत ट्विटर हँडलवरुन म्हटले की, "आधी बीबीसी डॉक्युमेन्ट्री आली, त्यावर बंदी घालण्यात आली. आता आयकर विभागाने बीबीसीवर छापा टाकला आहे. ही अघोषित आणीबाणी". (Latest Marathi News)

सूत्रांकडून मिळालेल्या माहितीनुसार बीबीसीच्या कार्यालयात काम करणाऱ्या कर्मचाऱ्यांना कार्यालय सोडून घरी जाण्यास सांगण्यात आले आहे. तसेच कर्मचाऱ्यांचे मोबाईल देखील जप्त करण्यात आले आहेत. लंडनमधील बीबीसीच्या कार्यालयात छापेमारीची माहिती देण्यात आली आहे. मात्र अद्याप प्राप्तिकर विभागाकडून याबाबत कोणतीही माहिती देण्यात आलेली नाही.