Sanjay Raut On BJP: भाजपसोबत जाणाऱ्यांचं नुकसान होतं...; संजय राऊतांचं शिंदे सरकारला सुतोवाच

Sanjay Raut News: भारतीय जनता पक्षाने बाळासाहेब ठाकरे यांच्या शिवसेनेला सावत्रपणाची वागणुक दिली. त्यामुळे शिवसेना भाजपामधून वेगळी झाली, असे विधान ठाकरे गटाचे खासदार संजय राऊत यांनी केले. तसेच भाजपसोबत जाणाऱ्यांचं नुकसान होतं, भाजप हा अजगर किंवा मगर आहे, आतापर्यंत जे कोणी त्यांच्याबरोबर गेले त्यांना त्यांनी खाऊन टाकलं आहे. शिंदे गटातील नेत्यांना देखील हे सर्वकाही लवकरच कळेल, असं भाकीतही राऊत यांनी वर्तवलं आहे.

झालेल्या गटाचे दोन गट

शिंदे गटात सध्या अस्वस्थता आणि नाराजी आहे. त्यामुळे शिवसेनेच्या ठाकरे आणि शिंदे गटातील शिंदे गटातून आणखी दोन गट पडलेत, असं संजय राऊत म्हणाले. तसेच शिवसेना भाजपपासून वेगळी का झाली याविषयी सांगताना ते म्हणाले की, भाजपने त्यावेळी शिवसेनेच्या अनेक आमदारांना निधी मिळवून दिले नाहीत. त्यांची कामे रखडवून ठेवण्यात आली होती. क्रेंद्रापासून महाराष्ट्रापर्यंत दिलेली आश्वासने पूर्ण केली नाहीत. तसेच सत्तेत भागीदारीचा वाटा असूनही त्यांनी योग्य मान दिला नाही. त्यामुळे उद्धव ठाकरेंनी वेगळं होण्याचा निर्णय घेतला, असं कारण संजय राऊतांनी यावेळी सांगितलं आहे.

देवेंद्र फडणवीसांवर काय काय जबाबदाऱ्या टाकल्यात हे पहावं लागेल...

पत्रकारांशी संवाद साधताना राऊतांनी फडणवीसांवर मिश्कील टिपण्णी केली आहे. यावेळी राऊत म्हणाले की, देवेंद्र फडणवीस यांत्याकडे कोणती जबाबदारी सोपवली आहे माहिती नाही. आधी ते उत्तम विरोधी पक्ष नेता होते. नंतर ते मुख्यमंत्री आणि आता उपमुख्यमंत्री झाले आहेत.

तर काल ते तुटलेल्या गटाच्या मुख्यमंत्र्याची गाडी चालवत होते. त्यामुळे केंद्राने त्यांच्यावर कायकाय जबाबदाऱ्या टाकल्या आहेत ते पहावं लागले. फडणवीस फार चांगले आहेत. मात्र मला त्यांची दया येते किव येते. इश्वराने त्यांना लवकरात लवकर या संकटातून सोडवावं, असं राऊत म्हणाले.