Vidhan Sabha Election : संभाजीनगर, जळगावमध्ये सापडली मोठी रक्कम; पोलिसांकडून रक्कमेबाबत तपास सुरु

संभाजीनगर/ जळगाव : विधानसभा निवडणुकीच्या पार्श्वभूमीवर पोलिसांकडून नाकाबंदी करत वाहन तपासणी केली जात आहे. या तपासणीत छत्रपती संभाजीनगर व जळगाव शहरात कारमध्ये मोठी रक्कम सापडून आली आहे. पोलिसांकडून सदरची रक्कम जमा करत रक्कम कोणाची याबाबत तपास केला जात आहे. दरम्यान जळगाव शहरात सापडलेली रक्कम बाफना ज्वेलर्सची असल्याने ती परत करण्यात आली आहे. 

छत्रपती संभाजीनगर शहरातील सूतगिरणी परिसरातल्या निवडणूक विभागाच्या तपासणी नाक्यावर ४० लाख रुपयांची रक्कम सापडली आहे. पैठण तालुक्यातील बिडकीन येथून सचिन जाधव नावाचा व्यक्ती खाजगी गाडीतून ४० लाख रुपये घेऊन जात असताना स्थिर पथकाकडून तपासणी करण्यात आली. व्यंकटेश संस्थेची ती रक्कम असल्याचे सांगण्यात येत आहे. मात्र जी व्यक्ती रक्कम घेऊन आला आहे. त्याच्याकडे बँकेकडून कुठलाही क्यूआर कोड जनरेट केला नाही. त्यामुळे ही रक्कम संशयास्पद आहे. म्हणून त्याची निवडणूक विभागाने जप्ती करण्यात आली आहे. आयकर विभागांकडून याची शहानिशा करून या रकमेबाबत निर्णय घेतला जाणार आहे.

जळगावात सापडली अडीच कोटीची रक्कम 
जळगावात पोलिस नाकाबंदी करून तपासणी करत असताना वाहनात अडीच कोटी रुपयांची रोख रक्कम आढळली आहे. विधानसभा निवडणुकीच्या पार्श्वभूमीवर जळगावात शनिपेठ पोलीस स्टेशनच्या अधिकाऱ्यांसह कर्मचाऱ्यांच्या पथकाकडून तपासणी करत असताना अडीच कोटी रुपयाची रक्कम मिळून आली आहे. दरम्यान हि रक्कम आर. सी. बाफना ज्वेलर्सची असून बँकेत भरणा करण्यासाठी जात असताना नाकाबंदीत पोलिसांनी ही रक्कम ताब्यात घेतली आहे. या संदर्भातील पडताळणी करून ही कॅश वैध असून पोलिसांनी रक्कम आर. सी. बाफणा ज्वेलर्सच्या प्रतिनिधींना परत केली आहे. पथकाने ही रक्कम उपविभागीय अधिकारी संदीप गावित, पोलीस निरीक्षक रंगनाथ धारबडे यांनी नाकाबंदी दरम्यान ताब्यात घेतली. 

नालासोपार्‍यात एटीएम व्हॅनमध्ये आढळले साडेतीन कोटी
वसई : नालासोपारा एसटी आगाराजवळ गुरूवारी दुपारी एका एटीएम व्हॅनमध्ये साडेतीन कोटी रुपयांची रोकड आढळली आहे. गुन्हे शाखा ३ च्या पथकाने ही रोकड असलेली व्हॅन जप्त केली असून एवढी रक्कम कुणासाठी आणली त्याची चौकशी सुरू आहे.