Raigad News: नगराध्यक्ष आणि त्यांच्या पतीची दादागिरी; पगार मागायला आलेल्या महिला कर्मचाऱ्याला शिवीगाळ करत मारहाण

>> सचिन कदम

रायगड : नगरपालिकेतील निवृत्त कर्मचारी महिलेला नगराध्यक्ष आणि तिच्या पतीने मारहाण केल्याचा प्रकार समोर आला आहे. तळा नगर पंचायतीच्या नगराध्यक्ष अस्मिता भोरावकर आणि त्यांचे पती चंद्रकांत भोरावकर यांनी शिल्लक पगार मागायला आलेल्या महिला कर्मचाऱ्याला चक्क लाथाबुक्क्यांनी मारहाण (Beaten) करत शिवीगाळही केली आहे. (Raigad News)

नगर पंचायत कार्यालयाच्या आवारातील या धक्कादायक प्रकाराचा व्हिडीओ समोर आला आहे. मंगला पारखे असं या पीडित महिला कर्मचाऱ्याचं नाव आहे. ती नगरपालिकेत ग्रंथपाल म्हणून काम पाहत होती. निवृत्त झाल्यावर देखील पगाराची रक्कम नगर पालिकेतून येणे बाकी होती. हा पगार मागायला ती गेली असता हा प्रकार घडला. (Latest News Update)

पुन्हा इथं आलीस तर ठार मारू अशी धमकीही या नगराध्यक्ष आणि त्यांच्या पतीने दिली आहे, असा आरोप पीडित महिलेने केला आहे. सध्या ही महिला प्रचंड भीतीच्या सावटाखाली आहे. या प्रकरणी तळा पोलीस ठाण्यात रात्री उशिरा दोघांवरही गुन्हा दाखल झाला आहे. या घटनेचा परिसरात निषेध होत आहे.

पीडित महिलेने दिलेल्या माहितीनुसार, मी माझा पगार मागण्यासाठी गेली असता तळा ग्राम पंचायतीमध्ये मिटिंग सुरु होती. तिथे चंद्रकांत मुळे, मंगेश शिगवण, चंद्रकांत घोरावकर, रवी मुंढे आणि नगराध्यक्षा मॅडम बसल्या होत्या. मी गेल्या गेल्या त्यांनी मिटींग बंद केली आणि मला ओढत बाहेर आणलं आणि बेदम मारलं. लाथा मारल्या पण मला कुणी मदत करायला आलं नाही. त्यांनी कपडे फाडले आणि मला मारण्याची धमकी दिली आहे.