शशिकांत शिंदे स्टंटबाज : प्रवीण दरेकर

सातारा : राष्ट्रवादी काॅंग्रेसचे आमदार शशिकांत शिंदे यांना नेहमीच चर्चेत राहण्याची आवड आहे. त्यामुळे त्यांची स्टंटबाजी चालू असते. भारतीय जनता पक्षाने त्यांना शंभर काेटींची आॅफर दिली हा त्यांचा एक प्रकारचा स्टंट असून भाजप त्यांना अशा पद्धतीचे आॅफर देईल असे मला वाटत नसल्याचे विधान परिषदेचे विराेधी पक्ष नेते प्रवीण दरेकर यांनी नमूद केले.

आमदार शशिकांत शिंदे यांनी सातारा जिल्ह्यातील एका कार्यक्रमात पुन्हा एकदा भाजपच्या शंभर काेटीच्या आॅफरबाबत उल्लेख केला. आमदार शिंदे म्हणाले भाजपचे आजही माझ्यावर प्रेम आहे आणि त्यावेळी देखील हाेते. त्यावेळेस त्यांनी देऊ केलेले शंभर कोटी घेतले असते तर बरे झाले असते असे आमदार शिंदेंनी म्हणताच सर्वजण चकीत झाले. पुढं शिंदेंनी पण भाजपला माहित आहे मी शरद पवार यांचा निष्ठावंत कार्यकर्ता आहे, मेलो तरी शरद पवारांना सोडणार नाही असे म्हणताच टाळ्यांचा कडकडाट झाला.

आमदार शशिकांत शिंदे यांच्या वक्तव्यानंतर आता भाजपमधून प्रतिक्रिया येऊ लागल्या आहेत. भाजपचे आमदार आणि विधान परिषदेचे विरोधी पक्षनेते प्रवीण दरेकर यांनी आमदार शिदेंना चर्चेत राहण्याची आवड असल्याचे सांगत त्यासाठीच त्यांनी ताे पुन्हा खटाटाेप सुरु केल्याचे नमूद केले. दरम्यान किरीट साेमय्या यांनी देखील आज आमदार शशिकांत शिंदेवर टीका करीत जरंडेश्वर कारखान्याची चाैकशी हाेणारच असे ठणकावून सांगितले.