Palghar Zp School : शिक्षण हक्क कायदा कागदावरच; जिल्हा परिषद शाळेत केवळ ५ विद्यार्थी हजर

फैय्याज शेख 

मोखाडा (पालघर) : शिक्षण हक्क कायद्यानुसार प्रत्येक मुलाला मोफत आणि सक्तीचे शिक्षण दिले पाहिजे. या बरोबर कायद्यात अनेक बाबींचा समावेश आहे. परंतु मोखाडा तालुक्यात या कायद्याची प्रभावी अंमलबजावणी होत नसल्याचे समोर आले असून सगळा कारभार फक्त कागदोपत्री चालल्याचे दिसून येत आहे. कारण तालुक्यातील आसे येथील जिल्हा परिषद शाळेत केवळ ५ विद्यार्थी उपस्थित असल्याचे चित्र पाहण्यास मिळत आहे.

पालघर (Palghar) जिल्ह्यातील मोखाडा तालुक्यातील जिल्हा परिषद आसे ही केंद्र शाळा आहे. तरी देखील येथे गंभीर प्रकरण समोर आले आहे. या (Zp School) शाळेत पहिली ते आठवी पर्यंतचे वर्ग असून येथे एकुण ५६ विद्यार्थी शिक्षण घेत आहेत. मात्र यातील गंभीर बाब म्हणजे १५ जूनपासून शाळा सुरू झाली. परंतु शाळा सुरु झाल्यापासून चौथीचा १, सहावीचे २ आणि सातवीमध्ये केवळ २ असे फक्त पाचच विद्यार्थी शिक्षण घेत आहेत. तर बाकीचे विद्यार्थी अद्याप शाळेतच आले नसल्याचे धक्कादायक चित्र समोर आले आहे. 

शाळेत केवळ विद्यार्थीचे कागदोपत्री पट दाखवले  गेल्याने बाकीचे उरलेल्या ५१ विद्यार्थ्यांच्या शिक्षणाचे काय असा प्रश्न उपस्थित केला जात आहे. विशेष म्हणजे काही दिवसांपूर्वी पालघर जिल्हा परिषदेचे अध्यक्ष प्रकाश निकम यांनी आसे (Zilha Parishad) जिल्हा परिषद गटाचा दौरा केला होता. मात्र येवढी मोठी गंभीर बाब त्यांच्या लक्षात कशी नाही? हा प्रश्न यानिमित्ताने उपस्थित होत असून त्यांचा हा दौरा फोल ठरला आहे.