धक्कादायक : दोरी उड्यांप्रमाणे हातात साप घेऊन तरुणाने मारल्या उड्या! पहा Video

पालघर : काही तरुण जोशात येऊन कधी काय करतील याचा नेम नाही. आपण करत असलेल्या कृतीचा परिणाम काय होऊ शकतो याचा विचार न करता कोणतीही कृती केली जाते. असाच एक धक्कादायक व तितकाच संतापजनक प्रकार पालघरमध्ये (palghar) समोर आला असून एक तरुण चक्क दोरी उड्या मारतात त्या प्रमाणे हातात साप घेऊन उड्या मारतोय आणि काही तरुण त्याचा व्हिडीओ बनवत आहेत. हा व्हिडीओ सध्या सोशल मीडियावर प्रचंड व्हायरल होत आहे.

पालघर मधील एका तरुणाचा सापासोबत (Snake) जीवघेणा खेळ करत असल्याचा व्हिडीओ समोर आला आहे. सदर तरुण हा हातात धामण जातीचा साप पकडून त्या सापाला घेऊन दोरी उड्यांप्रमाणे उड्या मारत त्यासोबत खेळत असल्याचा व्हिडिओ (Video) सध्या समाज माध्यमावर व्हायरल होत आहे. याबाबत सर्प मित्रांसह नागरिकांकडून संताप व्यक्त करण्यात येत आहे. तरुणाची बोलीभाषा ही पालघर मधील असून सदर तरुण पालघर मधील कुठला आहे याचा शोध सध्या सुरू आहे.

तरुणाकडून स्वतःच्या जीवाशी आणि सर्पाच्या जीवाशी खेळ सुरू असून त्याच्यावर वन्यजीव (संरक्षण) अधिनियम 1972 अंतर्गत गुन्हा दाखल व्हावा अशी मागणी आता वन्यजीव संरक्षकाकडून जोर धरू लागली आहे. एकीकडे वन्यजीव वाचावे यासाठी अनेक वन्यजीव संरक्षक संस्था विविध उपक्रम हाती घेत असताना अश्या प्रकारचे विकृत तरुण वन्य प्राण्यांच्या जीवाशी खेळून प्रसिद्धी मिळविण्याचा प्रकार करत आहेत. याला कुठे तरी आळा बसावा व त्यांना काठोरातील कठोर शिक्षा व्हावी जेणेकरून भविष्यात अश्या प्रकारे कोणी वन्य प्राण्यांना त्रास देणार नाही अशी मागणी वन्य प्रेमींनी केली आहे.

Edited By : Krushnarav Sathe