तबरेज शेख..
Nashik: जागतिक महिला दिन अवघ्या दोन दिवसांवर येवून ठेपला आहे. त्यामुळे राज्यभरात महिलादिनाची जय्यत तयारी सुरू आहे. त्याचबरोबर देशभरात मेट्रो, स्मार्ट सिटीचे जाळे तयार होत असतानाच सामान्य नागरिक मात्र मूलभूत गरजांपासूनच वंचित असल्याचे चित्र दिसत आहे. असाच नाशिकमध्ये एक लाजिरवाणा प्रकार समोर आला आहे. ज्यामुळे नाशिक (Nashik) जिल्ह्यात आरोग्य प्रशासनाचा भोंगळ कारभार समोर आला आहे.
याबाबत समोर आलेल्या माहितीनुसार, त्र्यंबकेश्वर तालुक्यात बरड्याचीवाडी गावची यशोदा आव्हाटे ही महिला प्रसूतीसाठी आली असता अंजनेरी प्राथमिक आरोग्य केंद्रात डॉक्टर नसल्याने आईनेच मुलीची प्रसूती केल्याची लाजिरवाणी बाब उघडकीस आली आहे. ज्यामुळे सर्वत्र संताप व्यक्त केला जात आहे.
ही महिला आई आणि आशा वर्कर सोबत अंजनेरी प्राथमिक आरोग्य केंद्रात दाखल झाली होती. आईच्या मदतीने प्रसूती होताच यशोदा यांनी एका गोंडस मुलीला जन्म दिला आहे. जागतिक महिला दिन दोन दिवसांवर आलेला असतांनाच हा प्रकार समोर आल्याने खळबळ उडाली आहे.
दरम्यान, या घटनेनंतर वैद्यकीय अधिकारी यांच्यावर तात्काळ निलंबनाची कारवाई करण्यात यावी, अशी मागणी सामाजिक कार्यकर्ते भगवान मधे यांनी केली आहे. तालुक्यातील अनेक प्राथमिक आरोग्य केंद्रात अशीच परिस्थिती असून एकही डॉक्टर मुख्यालय राहत नाही. त्यामुळे येत्या 8 मार्च जागतिक महिला दिनी रास्ता रोको आंदोलन करण्यात येणार असल्याचे मधे यांनी सांगितले. (Latest Marathi News Update)
Read Marathi news and watch Live TV. Breaking news from Maharashtra, India, Pune, Mumbai, Politics, Entertainment, Sports, Lifestyle at SaamTV. Get Live Marathi news on Mobile. Download the Saam Tv app for Android and IOS.
