Nashik Breaking : क्लासमध्ये बेंचवर बसण्यावरून वाद, पोरांचा जोरदार राडा, एका विद्यार्थ्याचा मृत्यू

नाशिकच्या सातपूर परिसरात घडलेल्या एका धक्कादायक घटनेने सध्या शहरात खळबळ उडाली आहे. खाजगी क्लासमध्ये शिक्षण घेत असलेल्या दहावीच्या विद्यार्थ्याची बेंचवर बसण्याच्या वादातून हत्या करण्यात आली. मयत विद्यार्थ्याचे नाव यशराज गांगुर्डे असून, तो सातपूर परिसरातील रहिवासी होता.

मिळालेल्या माहितीनुसार, बुधवारी यशराजचा त्याच क्लासमध्ये शिकणाऱ्या दोन अल्पवयीन मित्रांसोबत बसण्याच्या जागेवरून वाद झाला होता. हा वाद तात्पुरता थांबला असला तरी, त्याचे परिवर्तन शनिवारी हिंसक प्रकारात झाले. दोन्ही अल्पवयीन विद्यार्थ्यांनी यशराजला क्लासच्या आवारात बोलावून घेतले आणि त्याच ठिकाणी हाताने मारत, लाथाबुक्क्यांनी जोरदार मारहाण केली.

या हल्ल्यात यशराज गंभीर जखमी झाला. त्याला तातडीने रुग्णालयात दाखल करण्यात आले, मात्र उपचारादरम्यान त्याचा मृत्यू झाला. डॉक्टरांनी दिलेल्या प्राथमिक अहवालानुसार, डोक्याला झालेल्या आघातामुळे त्याचा मृत्यू झाला असण्याची शक्यता वर्तवण्यात येत आहे. या घटनेनंतर सातपूर पोलीस स्टेशनमध्ये खुनाचा गुन्हा दाखल करण्यात आला असून, दोन्ही अल्पवयीन आरोपींना पोलिसांनी ताब्यात घेतले आहे. दोघेही 'विधी संघर्षातील बालक' या श्रेणीत मोडत असल्याने त्यांच्यावर बाल न्याय कायद्यानुसार कारवाई सुरू आहे.

शाळकरी वयातील मुलांमध्ये वाढत चाललेली हिंसक प्रवृत्ती आणि खाजगी शिकवण्या देणाऱ्या क्लासेसमध्ये विद्यार्थ्यांच्या सुरक्षिततेचा प्रश्न यामुळे पुन्हा ऐरणीवर आला आहे. एका किरकोळ कारणावरून घडलेली ही जीवघेणी घटना पालकांमध्ये चिंता निर्माण करणारी ठरत आहे. सध्या पोलिसांकडून सविस्तर चौकशी आणि इतर विद्यार्थ्यांचे जबाब नोंदवण्याचे काम सुरू आहे.