Nashik City News : नाशिककरांसाठी मोठी बातमी! 'या' दिवशी राहणार पाणीपुरवठा बंद, काय आहे कारण?

Nashik Water Supply : शनिवारी (१ फेब्रुवारी) रोजी संपूर्ण नाशिक शहरात पाणीपुरवठा बंद राहणार आहे. तसेच रविवारी (२ फेब्रुवारी) सकाळी पाणीपुरवठा कमी दाबाने राहणार असल्याची माहिती समोर आली आहे. गंगापूर, मुकणे धरणांवरील विद्युतविषयक कामांमुळे महानगरपालिकेतील सर्व जलशुद्धीकरण केंद्रे बंद राहणार असल्याने हा निर्णय घेण्यात आला आहे.

गंगापूर धरणावर महानगरपालिकेच्या पंपिंग स्टेशनसाठी १३२ केव्ही सातपूर व महिंद्र या दोन फिडरवरुन ३३ केव्ही उच्च दाबाचा वीजपुरवठा होतो. शिवाय बारा बंगला. शिवाजीनगर, पंचवटी, निलगिरी बाग, गांधीनगर व नाशिक रोड येथील जलशुद्धीकरण केंद्र येथे रॉ वॉटरचा पुरवठा करण्यात येतो. तर मुकणे धरणातील पंपिंग स्टेशनला गोंदे येथील रेमंड सबस्टेशन येथून एक्सप्रेस फिडरद्वारे जॅकवेलसाठी ३३ केव्हीचा वीजपुरवठा केला जातो.

गंगापूर धरण येथे नवी थेट जलवाहिनीच्या अंतर्गत नवे पंपिंग स्टेशन उभारण्याचे काम सुरु करण्यात आले आहे. यासाठी ३३ केव्ही दाबाच्या वीजवाहिन्या शिफ्ट करणे, सबस्टेशन,पंप हाऊसमधील विद्युतविषयक कामे शनिवारी केली जाणार आहेत. तर मुकणे धरण पंपिंग स्टेशनवरील सबस्टेशन,पंप हाऊसमधील विद्युतविषयक कामे हाती घेण्याच नाशिक महानगरपालिकेचे नियोजन आहे.

गंगापूर आणि मुकणे धरणाद्वारे पंपिंग करता येणार नसल्याने सर्व जलशुद्धीकरण केंद्रे बंद असणार आहेत. यामुळे शनिवारी शहरात पाणी पुरवठा होणार नसल्याची माहिती समोर आली आहे. याशिवाय रविवारी सकाळी कमी दाबाने पाणी येणार असल्याचे महानगरपालिकेने स्पष्ट केले आहे.