Nashik Jindal Company Fire: ३ दिवसांपासून धुमसतेय जिंदाल कंपनीतील आग; १ KMचा परिसर केला रिकामा

गेल्या तीन दिवसांपासून जिंदाल कंपनीमधील आग धुमसतेय. तीन दिवसांपासून आग शमविण्याचे प्रयत्न केलं जात आहे. परंतु अद्याप अग्निशामक दलाला यात यश आले नाहीये. कच्चा माल, केमिकल तसेच प्लास्टिकमुळे आगीचा भडका होत असल्यानं प्रशासनाने कंपनीपासूनचा १ किलोमीटरचा परिसर रिकामा केलाय. प्रतिबंधात्मक आदेश लागू करण्यात आलाय. दरम्यान १५ किलोमीटरचा परिसरावर धोक्याची घंटा आहे. ( Nashik Jindal Company Fire)

नाशिक-मुंबई महामार्गालगत जिंदाल कंपनी आहे. तीन दिवसांपूर्वी या कंपनीला आग लागली होती. अद्याप आगीवर नियंत्रण मिळवता आले नाहीये. पॉलिफिल्म बनवण्यासाठी वापरण्यात येणाऱ्या कच्चा माल आणि रसायनांमुळे आग अनियंत्रित झालीय. कंपनीच्या परिसरात गॅस टाकी आहे, या गॅस टाकीचा स्फोट झाला तर १५ किलोमीटरचा परिसर उद्धवस्त होऊ शकतो.

गॅस टाकीचा ब्लास्ट होऊ नये म्हणून अग्निशमन दलाकडून या टाकीच्या परिसरात सातत्याने पाणी आणि फोम फवारणी केली जातेय. गॅस टाकीचा स्फोट होऊ नये, यासाठी शर्थीचे प्रयत्न सुरू आहेत.

जिंदाल कंपनीला लागलेल्या आगीत दोन कामगार जखमी झाल्याची माहिती समोर आलीय. शॉर्ट सर्किटमुळे आग लागल्याची प्राथमिक माहिती मिळालीय. गेल्या ४८ तासांपासून आग विझवण्याचे शर्थीचे प्रयत्न सुरू आहेत. या आगीवर नियंत्रण मिळवण्यासाठी नाशिक, ठाणे, मुंबई, मालेगाव महापालिका आणि इतर नगरपालिकांमधून ३० ते ४० अग्निशमन बंब घटनास्थळी पाठवण्यात आलेत. पाणी आणि फोमच्या माध्यमातून आग आटोक्यात आणण्याचे प्रयत्न केली जात आहेत.

दरम्यान आगीत स्फोटांचे आवाज होत असल्याने परिसरात भीतीचे वातावरण आहे. पूर्ण कंपनीला आग लागल्यास साडेसहा हजार कोटींचे नुकसान होईल असा अंदाज वर्तवला जात आहे. नाशिक महापालिकेचे प्रभारी अग्निशमन अधिकारी प्रदीप बोरसे या घटनेप्रकरणी माहिती देताना सांगितले की, या आगीत जिंदाल कंपनीचा एक पूर्ण प्लँट आगीच्या भक्ष्यस्थानी गेलाय. कंपनीमध्ये वापरले जाणारे पाणी आग विझवण्यासाठी अपुरे पडत आहे.

इतर कंपन्यांकडूनही पाणी मागवले जातंय. दरम्यान या आगीत सर्वात धोक्याची बाब म्हणजे कंपनीच्या आवारात LPG टाकी आहे. या टाकीचे तापमान वाढू नये, यासाठी सतत पाणी व फोमचा मारा करून तापमान नियंत्रित ठेवण्याचे प्रयत्न सुरू आहेत.