Nashik News: ऐन दिवाळीत नाशिककरांवर जलसंकट; ८ प्रभागातील पाणीपुरवठा ३६ तासांसाठी राहणार बंद, कारण काय?

Nashik Water Supply News

नाशिककरांचं टेन्शन वाढवणारी बातमी समोर आली आहे. ऐन दिवाळीत शहरातील ८ प्रभागांमध्ये पाणीपुरवठा बंद ठेवण्यात येणार आहे. गुरुवारी आणि शुक्रवारी ३६ तासांसाठी हा पाणीपुरवठा बंद राहणार आहे. गांधीनगर जलशुद्धीकरण केंद्रांच्या सॅम्प दुरुस्तीच्या कामासाठी पाणीपुरवठा बंद राहणार असल्याचं महापालिकेने सांगितलं आहे. ('साम टीव्ही'चं व्हॉट्सअ‍ॅप चॅनल जॉईन करण्यासाठी येथे क्लिक करा)

प्रभावित होणाऱ्या ८ प्रभागातील नागरिकांनी पाणी जपून वापरावं, तसेच पाण्याची साठवण करून ठेवावी, असं आवाहन महापालिकेच्या वतीने करण्यात आलं आहे. जल वाहिनीची गळती झाल्याने ऐन दिवाळीच्या पहिल्या दिवशी नाशिककरांवर जलसंकट ओढवलं होतं.

त्यातच आता ८ प्रभागांमधील पाणीपुरवठा ३६ तासांसाठी बंद ठेवला जाणार असल्याने नाशिककरांना अडचणींना तोंड द्यावे लागणार आहे. पाणीपुरवठा बंद ठेवण्यात येणारे ८ प्रभाग नाशिकरोड विभागातील आहे. नागरिकांनी याची नोंद घेऊन सहकार्य करावे, असे महापालिकेने म्हटले आहे.

कोणत्या भागातील पाणीपुरवठा बंद?

यामध्ये प्रभाग क्रमांक १७ मधील लोखंडे मळ्यासह इतर परिसर, प्रभाग १८ मधील परिसर, प्रभाग १९ मधील परिसर, प्रभाग २० मध्ये पुणे रस्ता आणि इतर परिसर, प्रभाग २१ मधील जयभवानी रोड, सहाणे मळा, आणि परिसर, प्रभाग २२ मध्ये विहितगावसह इतर परिसर, याशिवाय प्रभाग २३ आणि प्रभाग ३० मधील परिसरांचा समावेश आहे.

तर उपरोक्त आठ प्रभागांमध्ये प्रभाग क्रमांक १६ मधील उपनगर, शांतीपार्क, अयोध्यानगर, मातोश्रीनगर, शिवाजीनगर, आरटीओ कॉलनी, तोरणा सोसायटी, समतानगरसह परिसरातील इतर भाग, अशा एकूण ९ प्रभागात पाणी पुरवठा शुक्रवारी बंद राहणार आहे.