Nandurbar RTO : थकीत असलेल्या २८ कोटी रुपयांचा दंड वसुली बाकी; वसुलीसाठी नंदुरबार आरटीओची वाहन फिटनेस तपासणी मोहीम

सागर निकवाडे 

नंदुरबार : नंदुरबार जिल्ह्यात चारचाकी वाहनांचे फिटनेस तपासणे अन् विलंब शुल्क भरण्याबाबत वाहन धारकांमध्ये उदासीनता दिसून येत आहे. जिल्ह्यात तब्बल २ हजार ७५६ चारचाकी वाहनांनी फिटनेस प्रमाणपत्र घेतलेले नाही. यामुळे या वाहन मालकांकडे तब्बल २८ कोटी रुपयांची फी आणि विलंब शुल्क शिल्लक आहे. यामुळे हि दंडाची रक्कम वसुलीसाठी आरटीओ रस्त्यावर उतरणार आहे. 

चारचाकी (Nandurbar) वाहन खरेदी केल्यानंतर काही वर्षांनी त्या वाहनाचे फिटनेस सर्टिफिकेट आरटीओकडून घेणे आवश्यक आहे. मात्र अनेक वाहन धारकांनी हे प्रमाणपत्र घेण्याकडे दुर्लक्ष केले आहे. या वाहन मालकांना आरटीओने दंड आकारणी केली होती. मात्र त्याची वसुली अद्याप बाकी आहे. दरम्यान या दंड वसुलीसाठी (Nandurbar RTO) नंदुरबार उपप्रादेशिक विभाग येत्या काही दिवसांत वाहन फिटनेस तपासणी मोहीम सुरू करणार आहे. 

नंदुरबार जिल्ह्यात २०१७ ते २०२४ या काळात वाहनाचे फिटनेस करणे आवश्यक असतानाही अडीच हजारांपेक्षा अधिक वाहन धारकांनी त्याकडे दुर्लक्ष केले आहे. यामुळे संबधित वाहनांसाठी फिटनेस शुल्क आणि विलंब शुल्क असे दोन्ही आकारले जाणार आहे. (RTO) सात वर्षांत अनेकांनी याकडे दुर्लक्ष केले असल्याने वाहनांच्या किमतीपेक्षा त्यांच्या दंड आणि विलंब शुल्काची रक्कम ही अधिक झाली असून अशा वाहनधारक दंड कसे भरतील अशा प्रश्न आता उपस्थित होत आहे.