नांदेडमध्ये पैनगंगा नदीमध्ये बुडून ३ मुलींचा मृत्यू झाल्याची घटना समोर आली आहे. या मुली आपल्या कुटुंबीयांसोबत सहलीसाठी गेल्या होत्या. त्याचवेळी पैनगंगा नदीमध्ये (Painganga River) पोहण्यासाठी उतरले असता पाण्याचा अंदाज न आल्यामुळे त्यांचा पाण्यामध्ये बुडून दुर्दैवी मृत्यू झाल्या आहेत. या मुलींचे मृतदेह नदीतून बाहेर काढण्यात आले आहेत. या घटनेमुळे एकच खळबळ उडाली आहे.
मिळालेल्या माहितीनुसार, नांदेडच्या किनवट तालुक्यातील पैनगंगा नदीवर सहलीसाठी मारेगाव येथील एक कुटुंब आले होते. यावेळी मारेगाव शिवारात पोहत असताना नदीच्या पाण्यात बुडून तिघींचा मृत्यू झाला. आज दुपारी दीडच्या सुमारास ही घटना घडली. यामध्ये दोन सख्ख्या बहिणींचा समावेश आहे.
ममता शेख जावेद (वय 21 वर्षे), पायल देविदास कांबळे (वय 16 वर्षे) आणि तिची बहीण स्वाती देविदास कांबळे अशी पैनगंगा नदीत बुडून मृत्यू झालेल्या मुलींची नावं आहेत. या मुली आपल्या कुटुंबीयांसोबत सहलीसाठी याठिकाणी आल्या होत्या. ममता, पायल आणि स्वाती या तिघी आणि इतर काही जण पोहण्यासाठी नदीमध्ये गेले होते. तिघीही नदीत एकमेकांवर पाणी टाकत पोहण्याचा आनंद घेत होत्या.
नदीमध्ये पोहण्याचा आनंद घेत मस्ती करत असताना यामधील एक जण नदीमध्ये बुडू लागली. तिला वाचवण्यासाठी गेलेल्या इतर दोघीही बुडाल्या. पोहता येत नसल्यामुळे या तिघींचा देखील नदीमध्ये बुडून मृत्यू झाला. तर पोहता येत असलेली एक महिला नदीतून सुखरूप बाहेर आली. या घटनेमध्ये दोन मुलींना गमावल्यामुळे कांबळे कुटुंबीयांवर दु:खाचा डोंगर कोसळला आहे. स्थानिक प्रशासन आणि गावकऱ्यांच्या मदतीने तिघींचे मृतदेह नदीतून बाहेर काढण्यात आले आहेत.
Read Marathi news and watch Live TV. Breaking news from Maharashtra, India, Pune, Mumbai, Politics, Entertainment, Sports, Lifestyle at SaamTV. Get Live Marathi news on Mobile. Download the Saam Tv app for Android and IOS.