Nanded News : 'आमच्या मुलीशी का बोलतोस..' प्रेम प्रकरणातून मारहाण, तरुणाने गळफास घेऊन संपवले जीवन

संजय सूर्यवंशी, साम टीव्ही, प्रतिनिधी

'आमच्या मुलीशी तू का बोलतोस' असे म्हणत नातेवाईकांनी एका तरुणाला बेदम मारहाण केली. तसेच गावात बेज्जत करतो अशी धमकी देखील दिली. याच भीतीपोटी एका १९ वर्षीय तरुणाने राहत्या घरी गळफास घेऊन आत्महत्या केली. ही घटना नांदेड शहराजवळच्या सुगाव या ठिकाणी गुरुवारी सकळी साडे आठच्या सुमारास घडल्याची माहिती समोर आली आहे. या प्रकरणी पोलिसांनी मुलीसह ७ जणांवर आत्महत्येस प्रवृत्त केल्याचा गुन्हा दाखल केला आहे.

नितीन प्रभू शिंदे असे मृत तरुणाचे नाव आहे. नितीन शिंदे या तरुणाचे थुगाव येथील एका मुलीसोबत प्रेम प्रकरण सुरु होते. तीन ते चार वर्षांपूर्वी दहावीत शिकत असताना दोघांमध्ये मैत्री झाली. त्यानंतर मैत्रीचं रूपांतर प्रेमात झालं. एक वर्षापूर्वी मुलीच्या घरच्यांना त्यांच्या या प्रेमप्रकरणाबाबत माहिती झाली. यावेळी दोघांची घरच्यांनी समजूत काढली.

दरम्यान सहा महिन्यापूर्वी मुलीच्या चुलत भावाने 'मुलीशी फोनवर का बोलतो' असे म्हणत नितीनला मारहाण केली. १८ मार्च रोजी नितीन कामाहून घरी परतत असताना मुलीच्या घरच्यांनी त्याला पुन्हा मारहाण केली. आम्ही देशमुख आहोत, तुम्ही पाटील आहात; तुमची औकात नाही, रस्त्यावर आणून बेज्जत करतो, चिरून टाकतो अशी धमकी देखील दिली.

भीतीपोटी नितीन शिंदे या तरुणाने गुरुवारी राहत्या घरी सिलिंगला दोरी बांधली आणि गळफास घेऊन आत्महत्या केली. नितीनचे वडील प्रभू शिंदे यांनी केलेल्या तक्रारीवरुन मुलीसह संतोष भोसले, विक्रम भोसले, अर्जुन भोसले, नितीन भोसले, ज्ञानदेव भोसले यांच्यावर लिंबगाव पोलीस ठाण्यात आत्महत्येस प्रवृत्त केल्याचा गुन्हा दाखल करण्यात आला आहे.