Nanded News : पैसे घ्या पण कामे करा; गळ्यात नोटांचा हार, समोर स्पीकरवर रेकॉर्डिंग; नांदेडमध्ये महिला सरपंचाचं अनोखं आंदोलन

नांदेड : जिल्हा परिषद कार्यालयाच्या अंतर्गत येणाऱ्या ग्रामपंचायतीमध्ये कुठलेही काम होत नसल्याने अखेर महिला सरपंचाने चक्क गळ्यात नोटांचा हार घालून जिल्हा परिषद कार्यालयासमोर धरणे आंदोलन सुरू केलं आहे. पैसे दिल्याशिवाय कुठलंही काम जिल्हा परिषद कार्यालयातील अधिकारी करत नाहीत, असा आरोप या महिला सरपंचाचा आहे. नांदेड तालुक्यातील इंजेगाव येथील मुक्ताई पंचलिंगे असं या आंदोलन करणाऱ्या महिलेचं नाव आहे.

या महिला सरपंचाने अनेक वेळा जिल्हा परिषद कार्यालयामध्ये विविध मागण्यांसाठी निवेदन दिली. परंतु त्या मागण्ंयाकडे जिल्हा परिषद प्रशासनाने साफ दुर्लक्ष केल्याचा आरोप या महिला सरपंचाने केला आहे. नांदेड पंचायत समितीसाठी कायमस्वरूपी गटविकास अधिकारी मिळत नाहीये. गावात स्मशानभूमी नाहीये, अंगणवाडीसाठी इमारत देखील नाहीये, अशा विविध समस्या गावांमध्ये आहेत. जिल्हा परिषद कार्यालय मात्र या समस्यांकडे दुर्लक्ष करत असल्याने अखेर या महिला सरपंचने जिल्हा परिषद कार्यालयासमोर धरणे आंदोलन सुरू केलं आहे. सरपंचाने आंदोलनस्थी स्पीकर ठेवून त्यावर 'पैसे घ्या पण कामे करा', असा रेकाँर्डिंग लावली.