Nagpur : सरकारी धान्याचा काळाबाजार; २०० पोते तांदूळ नेताना जप्त

पराग ढोबळे 

नागपूर : गोरगरिबांना स्वस्त धान्य दुकानातून धान्य वाटप करण्यात येत असते. मात्र या सरकारी धान्याचा काळाबाजार केला जात असल्याचे समोर आले आहे. अशा पद्धतीने काळ्याबाजारात विक्रीसाठी नेला जात असताना २०० पोती तांदूळ घेऊन जाणारा ट्रक   नागपूरच्या ताजनगरमध्ये अन्न पुरवठा विभाग आणि पोलिसांनी कारवाई करत पकडला आहे.

रेशन कार्ड धारकांना दार महिन्याला मोफत धान्य वाटप करण्यात येत असते. यात प्रामुख्याने तांदूळ, गहू तर कधी ज्वारी देखील वाटप करण्यात येत असते. यासाठी अन्न पूरवठा विभागाकडून प्रत्येक रेशन धान्य दुकानात याचा पुरवठा करण्यात येत असतो. मात्र बऱ्याचदा लाभार्थ्यांना पूर्ण धान्य दिले जात नाही. तर काही लाभार्थी आले नाही त्यांच्या हिस्स्याचे धान्य विक्री केले जात असते. अशा प्रकारे मोठ्या प्रमाणात काळाबाजार सुरु असतो. 

ट्रकमध्ये भरला जात होता तांदूळ

दरम्यान अजनी पोलीस ठाण्याच्या हद्दीतील ताज नगरमध्ये सरकारी धान्य ट्रकमध्ये भरून घेऊन जात असल्याची माहिती अन्न पुरवठा विभागाला मिळाली होती. त्यानुसार अन्न पुरवठा विभागाचे अधिकारी आणि पोलीस घटनास्थळी पोहोचल्यावर एका टिनाच्या शेडमधून तांदळाची पोती काढून ट्रकमध्ये ठेवली जात असल्याचे आढळून आले. 

तांदूळ जप्त करत गुन्हा दाखल 

तांदळाची पोती मोहम्मद वसीम याचे असल्याचे सांगण्यात आले. अधिकाऱ्यांनी त्याच्याकडून पावती मागितल्यावर पावती देण्यास टाळाटाळ करू लागला. यानंतर अन्न पुरवठा अधिकारी आणि पोलिसांनी २०० पोती तांदुळासह धान्य ट्रक असा १४ लाख रुपयांचा माल जप्त केला आहे. तर मोहम्मद वसीम याच्याविरुद्ध अजनी पोलीस ठाण्यात जीवनावश्यक वस्तू अधिनियम 1955 अन्वये गुन्हा दाखल करण्यात आला.