Shocking : शाळेत भयंकर घडलं, विद्यार्थिनीला अंगावर वळ उमटेपर्यंत अमानुष मारहाण; धक्कादायक कारण आलं समोर

"छडी लागे छम छम, विद्या येई गम गम" या कवितेच्या ओळी जरी खऱ्या असल्या तरी, या छडीचा अतिरेक झाला तर एखाद्या चिमुकल्या जीवावर देखील बेतू शकतं. अशीच एक घटना नागपूरमध्ये घडली आहे. वर्गात आरसा आणल्याच्या कारणावरून चालू वर्गात शिक्षिकेने अमानुषपणे मारहाण केली. याप्रकरणी शिक्षिकेवर गुन्हा दाखल करण्यात आला आहे.

मिळालेल्या माहितीनुसार, सना (बदललेलं नाव) नागपूरमध्ये एका नामांकित शाळेत इयत्ता सातवीत शिकते. २२ जानेवारी रोजी हिंदी विषयाचा तास सुरू असताना, मैत्रिणीकडून आरसा घेऊन दुसऱ्या विद्यार्थिनीला देत असताना शिक्षिकेने सनाला पाहिलं. आणि शिक्षिकेचा पारा चढला. संबंधित शिक्षिका तसलीम परवीन यांनी मुलीला कोणतेही कारण न देता ५ ते ६ जोरात कानाखाली मारल्या आणि वर्गाबाहेर काढले.

धक्कादायक बाब म्हणजे, हे प्रकरण एवढ्यावरच न थांबता सना शिकत असलेल्या शाळेतील मुख्याध्यापिका नासरीन अख्तर यांनी तिला केबिनमध्ये बोलावून स्टीलच्या पट्टीने बेदम मारहाण केली. या मारहाणीत मुलीच्या हाता-पायावर गंभीर जखमा झाल्या असून ती प्रचंड मानसिक दडपणाखाली आली. पीडित मुलीने याप्रकरणी कुटुंबियांना सांगितले असता सनाच्या वडिलांनी पोलीस ठाण्यात धाव घेतली. मुलीच्या वडिलांनी सुरुवातीला शाळा प्रशासनाकडे दाद मागितली, मात्र प्रशासनाने त्याकडे दुर्लक्ष केले. व प्रकरण दाबण्याचा प्रयत्न केला.अखेर २५ जानेवारी रोजी '१०९८ चाईल्ड हेल्पलाईनकडे तक्रार करण्यात आली.

चाईल्ड हेल्पलाईनच्या प्रतिनिधींनी तातडीने मुलीच्या घरी भेट देऊन तिचे समुपदेशन केले आणि जबाब नोंदवले. २६ जानेवारीला पोलिसांनी मुलीची वैद्यकीय तपासणी केली. २७ जानेवारी रोजी शाळेतील सीसीटीव्ही फुटेजही पोलिसांनी ताब्यात घेतले आहे. या प्रकरणी पोलिसांनी बाल न्याय अधिनियम २०१५, कलम ७५ आणि भारतीय न्याय संहिता (BNS)115(2),118(1), 3(5), व RTE 2009 कलम 17 अंतर्गत गुन्हे दाखल करण्यात आले. दरम्यान या घटनेनंतर विद्यार्थ्यांच्या शाळेतील सुरक्षिततेबाबत गंभीर प्रश्न उपस्थित केले जात आहेत.