Nagpur Crime : नागपुरात हत्येचे सत्र सुरूच; जुन्या वादातून तरुणाची भरचौकात हत्या

पराग ढोबळे 
नागपूर : नागपूर शहरात देखील गुन्हेगारीचे प्रमाण वाढत चालले आहे. वाढत्या गुन्हेगारीमुळे सर्वसामान्य नागरिक दहशतीमध्ये वावरत आहे. यात काही दिवसांपूर्वी क्षुल्लक कारणावरून मित्रानेच मित्राची हत्या केल्याची घटना घडली होती. हि घटना ताजी असतानाच नागपूर शहर पुन्हा एकदा खुनाच्या घटनेने हादरले आहे. जुन्या वादातून एका तरुणाची भर चौकात शस्त्राने वार करत हत्या करण्यात आली आहे. या घटनेने परिसरात खळबळ उडाली आहे. 

नागपूर शहरातील यशोधरा नगर पोलिस ठाण्याच्या हद्दीतील वनदेवीनगर चौकात ही घटना घडली आहे. यात सोहेल चंद असे मृत तरुणाचे नाव आहे. तर शेख शादाब शेख शहजाद, मोहम्मद सादिक अन्सारी आणि नौशाद शेख शहजाद असे अटकेतील आरोपीचे नावे आहेत. मृत सोहेल हा गुन्हेगारी पार्श्वभूमीचा होता. यामुळे दोन दिवसांपूर्वी त्याचा वनदेवी नगरातील शेख शादाब शेख शहजाद, मोहम्मद सादिक अन्सारी आणि नौशाद शेख शहजाद यांच्याशी वाद झाला होता. दोघांनीही एकमेकांना धमक्या दिल्या होत्या. 

चौकात गाठत केले वार 

दरम्यान सोहेल चंद हा वनदेवीनगर चौकात उभा असताना तिघे संशयित आरोपी तेथे पोहोचले. यानंतर त्यांनी सोहेल याच्या धारदार शस्त्राने वार केला. अचानक वार झाल्याने सोहेल हा रक्तबंबाळ अवस्थेत जमिनीवर पडला होता. त्याला रक्तबंबाळ अवस्थेत सोडून आरोपी तेथून फरार झाले. दरम्यान घटनेबाबत पोलिसांना माहिती देण्यात आल्यानंतर पोलिसांनी घटनास्थळी येत पंचनामा केला. 

अवघ्या काही तासात मारेकरी ताब्यात 

पोलिसांचे पथक घटनास्थळी पोहोचले. यानंतर जखमी सोहेल याला रुग्णालयात नेण्यात आले. मात्र डॉक्टरांनी सोहेलला मृत घोषित केले. दरम्यान पोलिसांनी लागलीच तपासाला सुरवात करत शोध मोहीम राबवून अवघ्या काही तासांतच तीनही मारेकरी असलेल्या आरोपींना अटक करण्यात आली. दरम्यान नागपुरात वाढत्या गुन्हेगारीने दहशतीचे वातावरण निर्माण झाले आहे.