Diwali Special MSRTC Bus : एसटी महामंडळाचा मोठा निर्णय! दिवाळीसाठी अतिरिक्त ५५ गाड्यांचं नियोजन, जाणून घ्या कुठून कुठे धावणार बसेस

प्रवाशांसाठी खुशखबर! दिवाळी सणानिमित्त बाहेर गावी जाणाऱ्या प्रवाशांची वाढती गर्दी लक्षात घेऊन राज्य परिवहन महामंडळाने मोठा निर्णय घेतला आहे. १५ ऑक्टोबर म्हणजे आजपासून छत्रपती संभाजीनगर शहरातून १० वेगवेगळ्या मार्गांवर दररोज ५५ अतिरिक्त एसटी बस सोडण्यात येणार आहेत. त्यामुळे गावी जाणाऱ्या नागरिकांची सोय होणार असून तिकीट मिळवण्यासाठी होणारी धावपळही टळणार आहे.

मिळालेल्या माहितीनुसार, दिवाळीसाठी गावी जाणाऱ्या प्रवाशांच्या सुविधेसाठी छत्रपती संभाजीनगर एसटी महामंडळाकडून विविध मार्गावर आजपासून दररोज ५५ जादा बस सोडण्यात येत आहेत. त्यासोबत प्रवाशांच्या गर्दीनुसार ऐनवेळी जादा बस चालविण्याचेही नियोजन एसटी विभागाकडून करण्यात आले आहे.

दिवाळीत प्रवाशांच्या सुविधेसाठी महामंडळाच्या छत्रपती संभाजीनगर विभागाने नियोजन केले. यंदा नागपूर, पुणे, नाशिक, जळगाव, भुसावळ, अकोला, धुळे, शिर्डी, बुलढाणा व लातूर मार्गावर जादा बस सोडण्यात येतील. दरम्यान यामुळे प्रवाशांचा प्रवास सुखरूप होणार आहे.

या मार्गावर धावणार जादा बसे

•सिडको बसस्थानकमधून नागपूर, लातूर, अकोला

•मध्यवर्ती बसस्थानकमधून नागपूर, बुलढाणा, अकोला

•पैठण आगारमधून : पुणे

•सिल्लोड आगारमधून : बुलढाणा, जळगाव, भुसावळ, नाशिक

•वैजापूर आगारमधून; बुलढाणा, नाशिक,

•गंगापूर आगारमधून : पुणे, नाशिक, शिर्डी,

•कन्नड आगारमधून : धुळे, भुसावळ

•सोयगाव आगारमधून : जळगाव, भुसावळ