Pune News: गोखले इन्स्टिट्यूटमधील आर्थिक गैरव्यवहार प्रकरणात मिलिंद देशमुख अटकेत

नागपूर येथील सर्व्हंट्स ऑफ इंडिया सोसायटीची जागा फ्री होल्ड करण्यासाठी दीड कोटी रुपयांची मागणी करून, गोखले इन्स्टिट्यूट ऑफ पॉलिटिक्स अँड इकॉनॉमिक्स संस्थेच्या शासकीय अनुदान व फीच्या रकमेपैकी १ कोटी ४२ लाख रुपये वापरल्याप्रकरणी संस्थेचे तत्कालीन सचिव मिलिंद देशमुख यांना अटक करण्यात आली आहे.

देशमुख यांनी ही रक्कम संस्थेच्या इतर सदस्यांची पूर्वपरवानगी न घेता वापरल्याने संस्थेची फसवणूक झाल्याचा ठपका ठेवण्यात आला आहे. यापूर्वीही त्यांच्यावर पुण्यातील डेक्कन पोलिस ठाण्यात फसवणुकीचा गुन्हा दाखल आहे.

तसेच, संस्थेच्या मालकीची हडपसर येथील एक जागा त्यांनी त्यांच्या नातेवाईकांच्या नावावर करून घेतल्याचाही आरोप त्यांच्यावर आहे.

या प्रकरणी देशमुख यांना ९ एप्रिलपर्यंत पोलिस कोठडी सुनावण्यात आली असून, भारत सेवक समाजाच्या नागपूरमधील सीझ होल्ड जागा फ्री होल्ड करण्यासाठी त्यांनी गोखले इन्स्टिट्यूटकडे २०२२ मध्ये दीड कोटींची मागणी केली होती. मात्र ही माहिती संस्थेच्या इतर पदाधिकाऱ्यांना दिली गेली नव्हती.

या आर्थिक अपहार प्रकरणात इतर कोणाचे सहभाग आहे का, याचा तपास पोलिसांकडून सुरू आहे.