Maval Vidhan Sabha : मावळमध्ये सुनील शेळके विक्रमी मतांनी विजयी; सर्वपक्षीय नेत्यांचा पॅटर्न ठरला अयशस्वी

मावळ : मावळ विधानसभा मतदारसंघात काट्याची लढत पाहण्यास मिळेल अशी अपेक्षा होती. मात्र याठिकाणी महायुतीचे उमेदवार सुनील शेळके यांनी विक्रमी मतांनी विजय मिळविला आहे. यात त्यांनी १ लाखापेक्षा अधिक मताधिक्य मिळवत विजय मिळविला आहे.  

विधानसभेच्या (Maval) मावळ मतदारसंघात ३ लाख ८६ हजार १६२ मतदार आहेत. त्यापैकी दोन लाख ८० हजार ३१९ म्हणजेच ७२.५९ टक्के मतदारांनी आपला मतदानाचा हक्क बजाविला होता. गेल्या निवडणुकीमध्ये मावळ विधानसभा मतदारसंघात ७१.१६ टक्के मतदान झाले होते. यंदा मतदानाचा टक्का वाढला असल्याने हे वाढीव (Vidhan Sabha Election) मतदान कोणाच्या पथ्यावर पडणारा याकडे सर्वांचेच लक्ष लागले होते. मात्र वाढलेला मतदानाचा टक्का आणि महिलांचे झालेले लक्षणीय मतदान हे सुनील शेळके यांच्या पारड्यात पडले. 

मावळ विधानसभा मतदारसंघ अजित पवारांच्या राष्ट्रवादी काँग्रेसचे उमेदवार सुनील शेळके यांच्याविरोधात अजित पवार गटाचेच असलेले बापू भेगडे यांनी बंडखोरी करत सुनील शेळके यांना आव्हान दिले होते. त्यामुळे मावळमध्ये सुनील शेळके विरुद्ध बापू भेगडे अशी थेट लढत येथे झाली. या लढतीत भाजपसह स्थानिक सर्व पक्षांनी एकत्र येत येथे शेळकेंविरोधात आघाडी उघडली होती. त्यामुळे मावळ मतदारसंघात काँटे की टक्कर पाहायला मिळेल अशी अपेक्षा होती. मात्र, आता सुनील शेळके यांनी मागील पंचवार्षिकचे स्वतःचे लीड मोडीत काढत तब्बल १ लाख पेक्षा अधिक मताधिक्य घेऊन मावळचा गड राखला आहे.