मंगेश भांडेकर, साम प्रतिनिधी
गडचिरोली जिल्ह्यातील छिंदभट्टी आणि छत्तीसगड राज्याच्या सीमेवरील जंगलात पोलीस आणि नक्षलवाद्यांमध्ये मोठी चकमक घडलीय. या चकमकीत १२ नक्षलावाद्यांचा खात्मा सुरक्षा दलाने केलाय. चकमक झालेलं ठिकाण हे जारावंडी पोलीस स्टेशनअंतर्गत येतं.
विशेष म्हणजे दक्षिण गडचिरोली जिल्ह्यातील अहेरी याच परिसरात सुरजगड इस्पात येथे स्टील कारखान्याच्या प्रकल्पाचं उद्धघाटन झालं. या उद्धघाटनाच्या कार्यक्रमाला उपमुख्यमंत्री देवेंद्र फडणवीस, अजित पवार आणि उद्योग मंत्री उदय सामंत हे उपस्थित होते. दरम्यान, गडचिरोली पोलिसांचे C-60 जवान आणि नक्षलवाद्यांमध्ये आज दुपारी दीड वाजताच्या सुमारास चकमक उडाली.
या चकमकीत सी-६० पार्टीचे पोलीस उपनिरीक्षक सतीश पाटील जखमी झालेत. त्यांच्या डाव्या खांद्याला गोळी लागली. चकमकीत जखमी झालेल्या उपनिरीक्षक सतीश पाटील यांना हेलिकॉप्टरने कांकेर येथून गडचिरोलीकडे आणण्यात आले. C60 चा एक PSI आणि एक जवान गोळीबारात जखमी झालेत. त्यांची प्रकृती स्थिर असून त्यांना नागपूरला हलवण्यात आले आहे.
आज सकाळी 10 वाजता गडचिरोली येथून एक ऑपरेशन सुरू करण्यात आले. ज्यामध्ये 7 C60 पथकांना वांडोली गावातील छत्तीसगड सीमेजवळ पाठवण्यात आले. गावाजवळ 12-15 नक्षलवादी तळ ठोकून असल्याची माहिती मिळाली होती. दुपारी दीड वाजता नक्षलवादी आणि पोलिसांमध्ये चकमक सुरू झाली.
संध्याकाळी उशिरापर्यंत ६ तासांहून अधिक काळ अधूनमधून सुरू होता. परिसरात केलेल्या शोधकार्यात आतापर्यंत 12 माओवाद्यांचे मृतदेह सापडलेत. आतापर्यंत 3 AK47, 2 INSAS, 1 कार्बाइन, 1 SLR यासह 7 स्वयंचलित शस्त्रे जप्त करण्यात आलीत. DVCM लक्ष्मण आत्राम उर्फ विशाल आत्राम, टिपागड दलम प्रभारी हे मृत नक्षल्यापैकी एक असल्याची ओळख पटलीय.
Read Marathi news and watch Live TV. Breaking news from Maharashtra, India, Pune, Mumbai, Politics, Entertainment, Sports, Lifestyle at SaamTV. Get Live Marathi news on Mobile. Download the Saam Tv app for Android and IOS.