Maratha - OBC Reservation: आरक्षणावरील भूमिका राज ठाकरेंना भोवणार? जरांगे आणि हाके यांनी घेतली टोकाची भूमिका

लोकसभा निवडणुकीनंतर आता महाराष्ट्रात विधानसभा निवडणुकीचे वारे वाहतायत.. सर्व राजकीय पक्षांनी निवडणुकीची तयारी सुरु केलीये.. मनसेने देखील निवडणुकीच्या मैदानात उतरण्यासाठी कंबर कसलीये.

मनसेच्या कार्यकर्त्यांपासून पक्षाचे अध्यक्ष राज ठाकरेंपर्यंत सगळेच मैदानात उतरले आहेत. त्यासाठी राज ठाकरे महाराष्ट्र दौऱ्यावर आहेत. या दौऱ्यादरम्यानच धाराशिवमध्ये त्यांनी आरक्षणाबाबत वक्तव्य केलं आणि मराठा आंदोलकांनी त्यांना हॉटेलमध्येच घेराव घातला. त्यानंतर राज ठाकरेंनी मराठा आंदोलकांची समजूत काढली.

राज ठाकरे यांच्या आरक्षणावरील वक्तव्यावर मनोज जरांगे पाटील म्हणाले आहेत की, त्यांना काय कळणार आहे. आरक्षण म्हणजे काय, आरक्षण कशासाठी लागतं. हे गरीब मराठा लोकांच्या जीवाशी खेळणारे लोक आहेत, सगळेच. तेही सत्तेचा एक भाग आहे. म्हणून त्यांच्यासोबत का आंदोलन करून त्यांना का भेटायचं, असं जरांगे म्हणाले.

''राज यांचा जन्म खरंच प्रबोधनकारांच्या घरात झालाय?''

तर ठाकरे यांच्या वक्तव्यावर ओबीसी नेते लक्ष्मण हाके म्हणाले की, ''तुमचा आरक्षणाबाबतचा दृष्टिकोन आणि भूमिका वाढावा. फुले, शाहू आणि आंबेडकरांचा पंगतीत प्रबोधनकार यांना सुद्धा बघितलं जातं, महाराष्ट्र त्यांना प्रबोधनकार म्हणून ओळखतो. त्यांच्या घरात जन्माला येऊन असं असंवेदनशील, असंविधानिक वक्तव्य करून तुम्ही पक्ष चालवत आहेत.''

यंदाच्या विधानसभा निवडणुकीत मनसेची भूमिका महत्वाची असणार आहे. राज ठाकरेंनी मनसे 225- 250 जागा लढवणार असल्याचं जाहीर केलंय त्यासाठी ते महाराष्ट्राच्या दौऱ्यावर आहेत. मात्र आरक्षणाच्या मुद्द्यावर त्यांनी घेतलेली भूमिका मतदार स्वीकारणार की त्यांना फटका बसणार याकडे लक्ष आहे.