Manikrao Kokate : रमीच्या डावामुळे माणिकराव कोकाटेंचे खातं जाणार? कुणाला मिळणार कृषिमंत्रीपद?

Maharashtra Politics : पावसाळी अधिवेशनादरम्यान सभागृहाचे कामकाज सुरु असताना कृषिमंत्री माणिकराव कोकाटे हे ऑनलाईन जंगली रमी खेळताना दिसले होते. शरद पवार गटाचे आमदार रोहित पवार यांनी माणिकराव कोकाटे यांचा रमी खेळतानाचा व्हिडीओ शेअर केला होता. या रमी प्रकरणामुळे विरोधकांनी कोकाटेंना धारेवर धरले होते. आता याच ऑनलाईन रमी व्हिडीओमुळे माणिकराव कोकाटे यांच्याकडून कृषिमंत्रीपद काढून घेतले जाणार असल्याच्या चर्चा सुरु झाल्या आहेत.

सभागृहात कामाच्यामध्ये कृषिमंत्री कोकाटे रमी खेळत होते असा दावा विरोधकांनी केला होता. या दाव्यावर कोकाटे यांनी मी युट्यूबवर व्हिडीओ पाहत होतो, तेव्हा रमीचा जाहिरात आली असे स्पष्टीकरण दिले होते. पण या रमी प्रकरणामुळे विरोधकांनी कोकाटे यांच्या राजीनाम्याची मागणी केली. या प्रकरणामुळे महायुती सरकारवर दबाव येत असल्याने कोकाटे यांचे खाते काढून घेतले जाणार असे म्हटले जात आहे.

मुख्यमंत्री देवेंद्र फडणवीस, उपमुख्यमंत्री अजित पवार, राष्ट्रवादी अजित पवार गटाचे प्रदेशाध्यक्ष सुनील तटकरे यांच्यामध्ये बैठक झाली. या बैठकीमध्ये माणिकराव कोकाटे यांच्याकडून कृषिमंत्रीपद काढून घेतले जाणार असल्याची माहिती सूत्रांकडून समोर आली आहे. माणिकराव कोकाटे यांच्याकडून राजीनामा न घेता कृषिमंत्रीपद दुसऱ्या नेत्याकडे सोपवले जाऊ शकते अशी चर्चा आहे.

कृषिमंत्रीपदाबाबतच्या निर्णयाची घोषणा लवकरच होणार असल्याची शक्यता आहे. मकरंद पाटील किंवा दत्ता भरणे यांच्यापैकी एकाकडे कृषिमंत्रीपदाचा भार दिला जाऊ शकतो अशी शक्यता वर्तवली जात आहे. दत्ता भरणे किंवा मकरंद पाटील यांच्याकडील एक खाते माणिकराव कोकाटे यांना दिले जाऊ शकते असे म्हटले जात आहे. कोकाटे यांना क्रीडा खाते मिळणार असल्याची चर्चा आहे.