Maharashtra Weather : राज्यात पुढील ५ दिवस कोसळधार; कोकणासह विदर्भ, मराठवाड्याला अलर्ट

Maharashtra Weather Update : राज्यामध्ये पुढील पाच दिवसात राज्यात पावसाचा जोर वाढणार असल्याचे संकेत हवामान विभागाने दिले आहेत. कोकण, विदर्भासह मध्य महाराष्ट्रात हाय अलर्ट जारी करण्यात आला आहे. याशिवाय पुढचे चार ते पाच दिवस मराठवाड्यात पाऊस हजेरी लावणार आहे. बंगालच्या उपसागरामध्ये कमी दाबाचा पट्टा सक्रीय झाल्याने महाराष्ट्रात पुढचे काही दिवस मुसळधार पाऊस पडणार असल्याची शक्यता वर्तवली जात आहे.

१३ ऑगस्ट ते १८ ऑगस्ट या कालावधीत कोकण, विदर्भ आणि मध्य महाराष्ट्रातील जिल्ह्यांमध्ये मुसळधार पाऊस राहणार आहे. हवामान खात्याने चंद्रपूरला ऑरेंज, तर वर्धा, भंडारा, गडचिरोली, गोंदिया आणि नागपूर या जिल्ह्यांमध्ये यलो अलर्ट देण्यात आला आहे. याशिवाय कोकणासह पुणे, सातारा, सांगली, सोलापूर आणि कोल्हापूरमध्येही यलो अलर्ट जाहीर करण्यात आला आहे. पुढचे चार दिवस कोकण आणि विदर्भामध्ये ऑरेंज आणि मध्य महाराष्ट्रात यलो अलर्ट देण्यात आला आहे.

विदर्भातील जिल्ह्यांमध्ये पाऊस हजेरी लावणार असल्याची शक्यता वर्तवली जात आहे. तुरळक ठिकाणी मुसळधार पाऊस पडू शकतो असाही अंदाज हवामान खात्याने व्यक्त केला आहे. काही ठिकाणी मेघगर्जनेसह विजांचा कडकडाट होऊ शकतो. मराठवाड्यामध्येही पुढचे काही दिवस मुसळधार पावसाची शक्यता आहे.

मध्य महाराष्ट्र आणि मराठवाड्यातील जिल्ह्यांमध्ये काही ठिकाणी पाऊस पडण्याची शक्यता वर्तवली जात आहे. कोकणामध्ये अनेक जागी जोरदार पाऊस पडेल असा अंदाज हवामान खात्याने वर्तवला आहे. पुढच्या चार ते पाच दिवसामध्ये महाराष्ट्रातील बहुंताशी भागात पाऊस पडणार असल्याचे म्हटले जात आहे. त्यानुसार हवामान खात्याने अलर्ट देखील जारी केले आहेत.