Rahul Gandhi: भारत जोडो यात्रेच्या ऐतिहासिक समारोपाकडे कॉंग्रेस नेत्यांचीच दांडी; शिवसेना, राष्ट्रवादीनेही फिरवली पाठ

रश्मी पुराणिक, साम टिव्ही

Bharat Jodo Yatra: कॉंग्रेस नेते राहुल गांधी यांच्या कन्याकुमारीहून निघालेल्या 'भारत जोडो यात्रे'चा आज शेवटचा दिवस होता. आज काश्मिरमधील श्रीनगरात ही यात्रा समाप्त झाली. यावेळी राहुल गांधींची जाहीर सभाही घेण्यात झाली. ज्यामध्ये त्यांनी या यात्रेबद्दलचा अनुभव सांगितला. मात्र महाराष्ट्र कॉंग्रेस कमिटीने मात्र या ऐतिहासिक समारोप सोहळ्याकडे पाठ फिरवल्याचे दिसून आले. (Bharat Jodo Yatra)

याबाबत अधिक माहिती अशी की, राहुल गांधींच्या ऐतिहासिक समारोपाच्या भाषणाकडे महाराष्ट्रातील प्रमुख कॉंग्रेस (Congress) नेत्यांनी तसेच शिवसेना आणि राष्ट्रवादीनेही पाठ फिरवल्याचे दिसून आले. कॉंग्रेस नेते नाना पटोले, बाळासाहेब थोरात, अशोक चव्हाण हे प्रमुख नेते या सभेला अनुपस्थित होते, तसेच राष्ट्रवादी आणि शिवसेनेनेही या सभेकडे पाठ फिरवली.

कॉंग्रेसकडून पृथ्वीराज चव्हाण, माणिकराव ठाकरे, मुकुल वासनिक, अविनाश पांडे, विश्वजीत कदम, प्रणिती शिंदे ही नेते मंडळी उपस्थित होती.

महत्वाचे म्हणजे प्रदेशाध्यक्ष नाना पटोले (Nana Patole) श्रीनगरमध्ये असूनही या कार्यक्रमाला गैरहजर होते. तर विधिमंडळ गटनेते बाळासाहेब थोरात आजारी असल्याने कार्यक्रमाला गेले नाहीत. दरम्यान, राष्ट्रवादी आणि शिवसेनेच्या नेत्यांनी देखील निमंत्रण मिळूनही कार्यक्रमाकडे पाठ फिरवली. या अनुपस्थितीमुळे महाराष्ट्रातील महाविकास आघाडीचे अस्तित्व धोक्यात असल्याची चर्चा आहे.