Leopard News : बिबट्या अकोल्यात पोहचला, बाळापूरमध्ये ४ पिल्लांसह आढळला, एक शेतकर्‍याच्या हाती लागले, पण...

अक्षय गवळी, अकोला

अकोल्यातील कसूरा गावात बिबट्याचा आणि त्याच्या पिल्लांचा मुक्त संचार सुरु असल्याचे आढळून आले आहे. जिल्ह्यातील बाळापूर तालुक्यातील कसूरा जवळील संत गजानन महाराज मंदिराजवळ बिबट्यासह ४ पिल्ले आढळून आली. या ४ पिल्लांपैकी १ पिल्लू रस्त्याने जाणाऱ्या शेतकऱ्यांच्या हाती लागले आहे.

मिळलेल्या माहितीनुसार, अकोल्यातल्या कसूरा गावात बिबट्या आणि त्याची ४ पिल्ले फिरत असताना शेतकऱ्यांना दिसली. या दरम्यान बिबट्या आणि ३ पिल्ले पुढे निघून जाण्यात यशस्वी झाले. मात्र ४ पैकी बिबट्याचे १ पिल्लू ग्रामस्थांनी पकडले. या संदर्भात माजी सरपंच विठ्ठल दही यांनीअकोला वन विभाग व उरळ पोलिसांना माहिती दिली. त्यानंतर वन विभागाचे अधिकारी तसेच उरळ पोलिस स्टेशनचे अधिकारी कसूर्यात दाखल झाले.

ज्या ठिकाणी बिबट्याचे पिल्ले दिसून आली तो मार्ग अकोला ते शेगाव दिंडी मार्ग आहे. या रस्त्यावर कायम मोठी वर्दळ असते. हे बिबटचे पिल्लू सध्या अकोला वन विभागाच्या ताब्यात आहे. या बिबट्याच्या पिल्लाची शारीरिक तपासणी केल्यानंतर जंगलात सोडून देण्याच्या परिस्थितीत असल्यास त्याला सुखरूप पणे सोडून देण्यात येईल अशी माहिती अकोला वन विभागाचे वनपाल गजानन गायकवाड यांनी दिली.

दरम्यान, हा संपूर्ण प्रकार काल रात्री घडला आहे. मात्र कसूरा लगत असलेल्या संत गजानन महाराजांच्या मंदिराजवळ बिबट आढळून आल्याने परिसरातील शेतकऱ्यांमध्ये भीतीचं वातावरण आहे. त्यामुळे वनविभागाची रेस्क्यू टीम या ठिकाणी तैनात करण्यात आली असून बिबट्या आणि त्याच्या उर्वरित ३ पिल्लांचा शोध सुरू आहे.