Kalyan Railway Police : नशेसाठी कफ सिरपचा वापर; कल्याण रेल्वे पोलिसांनी केली दोघांना अटक

अभिजित देशमुख
कल्याण : चेन्नई एक्सप्रेसने कर्नाटक कलबुर्गी येथून कल्याणला आलेल्या दोन जणांना कल्याण रेल्वे पोलिसांनी अटक केली आहे. त्यांच्याकडून २८० कफ सिरपच्या बाटल्या जप्त केल्या आहेत. अटक आरोपीची नावे नवाब सिद्दीकी आणि अकील मटके अशी आहे. हे दोघेही भिवंडी येथील राहणारे आहेत. कफ सिरपचा वापर नशेसाठी केला जात असल्याने पोलिसांनी दोघांना अटक केली आहे.

कर्नाटक कलबुर्गी येथून चेन्नई एक्सप्रेसने नवाब सिद्दीकी आणि अकील मटके हे दोन जण कल्याण रेल्वे स्थानकावर उतरले. कल्याण रेल्वे पोलीसांकडून (Railway Police) सुरू असलेल्या तपासणी दरम्यान या दोघांच्या बॅगेत कफ सिरपच्या बाटल्या आढळून आल्या. (Kalyan) कल्याण रेल्वे पोलिसांना संशय आल्याने त्यांनी या दोघांकडे याबाबत विचारपूस केली. मात्र दोघांनी उडवा उडवीची उत्तरे दिली. 

कफ सिरपचा वापर नशेसाठी करण्यात येत असल्याने रेल्वे पोलिसांचा संशय बळावला. त्यांनी या दोघांजवडील कफ सिरपच्या २८० बाटल्या ताब्यात घेत या दोघांना अटक त्यांची चौकशी सुरू केली. हे दोघे मूळचे भिवंडीचे राहणारे असून या दोघांनी बाटल्या कुठून आणल्या व त्या कोणाला विकणार होते. याचा तपास आता रेल्वे पोलीस करत आहेत.