गुरू-शुक्राच्या महायुतीचा रविवारी दिसणार नजारा

जळगाव : खगोलीय घटनांमध्ये रविवारी (ता. १) पहाटे पूर्व दिशेला गुरू आणि शुक्र ग्रहांच्या महायुतीचा (Great Conjunction) विलक्षण अनुभव पाहण्याचा योग आहे. चार वाजून १५ मिनिटांपासून हे दृश्य आपल्याला बघायला मिळेल. (Jalgaon news Jupiter Venus alliance will be seen on Sunday)

सूर्यमालेतील सगळ्यात मोठा ग्रह गुरू आणि सगळ्यात तेजस्वी दिसणारा शुक्र हे एकमेकांच्या अगदी जवळ आलेले आपल्याला दिसणार आहेत. दर वर्षी ते जवळ येतात, पण या वेळी ते एकमेकांच्या खूपच जवळ आलेले दिसणार आहेत. साध्या डोळ्यांनी तर ते दिसतीलच, पण टेलिस्कोपमधून गुरू त्याच्या चार चंद्रांसह आणि शुक्र यांना एकाच वेळी बघता येणार आहे.

युती आणि महायुती म्हणजे काय?

ज्या वेळी दोन ग्रह किंवा चंद्र आणि ग्रह एकमेकांजवळ येतात, त्याला ‘युती’ (Conjunction) म्हणतात. पण ते जेव्हा खूपच जवळ आलेले म्हणजे एकमेकांना चिटकल्यासारखे वाटतात त्यास ‘महायुती’ (Great Conjunction) म्हणतात.

पहाटेची वेळ असली, तरी आपल्या साखरझोपेशी थोडी तडजोड करून हा विलक्षण नजारा सर्वांनी बघावा.

-अमोघ जोशी, खगोल अभ्यासक