दैव बलबत्‍तर म्‍हणून तो वाचला; डोळ्यासमोर वीज कडाडली अन्‌

मेहुणबारे (जळगाव) : लांबेवडगाव (ता.चाळीसगाव) शिवारात साडेचारच्या सुमारास विजांच्या कडकडाटासह सुमारे अर्धा तास मुसळधार पाऊस झाला. त्यात वीज पडून तीन शेळ्यांचा जागीच मृत्यु झाला. तर शेळ्या चारणारा तरूण पावसापासून बचाव करण्यासाठी बाजुच्या झोपडीत शिरल्याने वाचला. (jalgaon-news-chalisgaon-Three-goats-die-in-lightning-strike-in-Lambe-Wadgaon-young-man-survived)

लांबे वडगाव (ता. चाळीसगाव) शिवरात शेळ्या चारत असतांना दुपारी साडेचार वाजेच्या सुमारास विजांच्या कडकडाटासह सुमारे अर्धा तास जोरदार पाऊस झाला. यावेळी येथील रोहीदास मंगा भील यांचा मुलगा सुनील हा लांबे वडगाव शिवारातील कैलास पाटील यांच्या शेताजवळ शेळ्या चारत होता. मुसळधार पावसामुळे सुनील हा जवळच्या झोपडीत आसरा घेण्यासाठी गेला असता त्याचवेळी आकाशातून वीज कडाडली व ती शेळ्यांवर पडली. त्यात तीन शेळ्यांचा जागीच मृत्यु झाला. सुदैवाने सुनील भील याने वेळीच झोपडीत धाव घेतल्याने तो वाचला.

शेळ्यांच्‍या मृत्‍यूने मोठे नुकसान

रोहिदास भील यांची अत्यंत गरीबीची परिस्थिती असून वीज कोसळून तीन शेळ्यांचा जागीच मृत्यु झाल्याने त्यांचे मोठे आर्थिक नुकसान झाले आहे. या घटनेचा तलाठी डी. एस. काळे यांनी पंचनामा केला आहे. यावेळी उपसरपंच प्रकाश पाटील, माजी सरपंच ज्ञानेश्वर पाटील, किरण जोशी आदी उपस्थित होते. रोहीदास भील यांना शासकीय मदत मिळावी अशी मागणी होत आहे.