भीषण अपघात; ट्रकची दोन वाहनांना धडक, पाच जणांचा मृत्‍यू

जळगाव : बकऱ्या घेऊन जात असलेल्‍या वाहनाला रॉंग साईडने भरधाव वेगाने येत असलेल्‍या ट्रकने जोरदार धडक दिली. या भीषण (Accident) अपघातात 5 जण ठार झाले; तर सहा जण जखमी झाल्याची घटना आज सकाळी नशिराबाद टोल नाक्याजवळील उड्डाणपुलाजवळ घडली. (jalgaon news accident truck hit two vehicles five people death on the spot)

जळगाव (Jalgaon) आणि नशिराबाद येथून बकऱ्या भरून पीकअप गाडी (क्र. एमएच ४३, एडी १०५१) फैजपूर (Faizpur) येथे बाजार असल्याने निघाले होते. राष्ट्रीय महामार्गावरील टोल नाक्याच्या पुढे असणाऱ्या उड्डाणपुलाजवळ (Bhusawal) भुसावळकडून भरधाव वेगाने येणार्‍या ट्रकने (क्र. एमएच ०९, एचजी ९५२१) जोरदार धडक दिली.

पाच जणांचा जागीच मृत्‍यू

यानंतर हीच ट्रक अजून एका वाहनाला धडकली. या भीषण तिहेरी अपघातात पाच जण ठार झाले असून सहा जण जखमी झाले आहेत. जखमीवर डॉ. उल्हास पाटील मेडिकल कॉलेजमध्ये उपचार सुरू आहेत. हा अपघात आज सकाळी साडेसात वाजेच्या सुमारास घडला. दरम्यान, अपघाताची माहिती मिळताच परिसरातील नागरिकांनी घटनास्थळी धाव घेऊन मदतकार्य सुरू केले. या अपघातामुळे महामार्गावरील वाहतूक विस्कळीत झाली होती.