Sameer Wankhede News: IRS समीर वानखेडेंचंही ठाकरे गटावर तोंडसुख; सकाळी उठून प्रेस कॉन्फरन्स घेणारे कुठे आहेत? राऊतांना डिवचलं

>> विजय पाटील

सांगली : निवडणूक आयोगाच्या निकालानंतर ठाकरे गटाकडे शिवसेना पक्षाचं नाव आणि पक्षचिन्ह धनुष्यबाण देखील राहिला नाही. पक्ष आणि पक्षचिन्ह शिंदे गटाचं असल्याचा निकाल निवडणूक आयोगाने दिला आहे. आयोगाच्या निकालानंतर विरोधक ठाकरे गटावर अक्षरश: तुटून पडले आहेत. यात आता IRS समीर वानखेडे यांची भर पडली आहे.

माझ्यावर आरोप करणारे राजकारणी आता कुठे आहेत? सर्वांना माहीत आहे,अशी टीका समीर वानखेडे यांनी केली आहे. सांगलीत आयोजित श्री शिवप्रतिष्ठान युवा हिंदुस्थानच्या दुसऱ्या वर्धापन दिनानिमित्त आयोजित कार्यक्रमात ते बोलत होते.

श्री शिवप्रतिष्ठान युवा हिंदुस्थानच्या वतीने सांगलीमध्ये दुसऱ्या वर्धापन दिनाच्या निमित्ताने यूपीएससी, एमपीएससी विद्यार्थ्यांच्यासाठी मार्गदर्शन मेळावा आयोजित करण्यात आला होता.या मेळाव्यात समीर वानखेडे यांनी विद्यार्थ्यांना मार्गदर्शन केले.

यावेळी बोलताना वानखेडे म्हणाले,माझ्यावर भ्रष्टाचाराचे आरोप केलेह गेले. माझी जात काढली.मात्र त्यांना काही सापडले नाही. लोकांना काही काम नसते तेव्हा बाष्कळ चर्चा सुरू होते. मीडिया, घाणेरडे राजकारणी, सकाळी दहा वाजता प्रेस कॉन्फरन्स घेणारे (Sanjay Raut) काही नेते आरोप करायचे.

तेव्हा मला लोक म्हणायचे तुला झोप येते का? तेव्हा मी फक्त छत्रपती शिवाजी महाराज यांचे नाव घ्यायचो आणि सर्व भीती निघून जायची. वाटायचे कितीही मंत्री,मंत्रालय येऊ दे हे तर किरकोळ आहेत.त्यामुळे तुमचे आदर्श महापुरुष असले पाहिजेत,असं मत वानखेडे यांनी व्यक्त केलं.

मुंबईतील शिपवर रेड झाल्यानंतर घाणेरडे राजकारणी आपल्यावर टीका करत होते. यातून आमचे खच्चीकरण झाले होते. मात्र शिवप्रतिष्ठान युवा हिंदुस्थान ही संघटना धावून आली आणि आज मी इथे आहे. पण माझ्यावर आरोप करणारे राजकारणी आता कुठे आहेत. ते सर्वांना माहित आहे,असा टोला समीर वानखेडे यांनी लगावला.