धक्कादायक! आरोग्य केंद्रातील अधिकारी कुलूप लावून गायब

बुलढाणा: कार्यालयीन वेळेमध्ये प्राथमिक आरोग्य केंद्रातील डॉक्टर आणि इतर कर्मचारी हे सर्वजण दाराला कुलूप लावून गायब असल्याचा धक्कादायक प्रकार समोर आला आहे. शेगाव तालुक्यातील जलंब येथील प्राथमिक आरोग्य केंद्रामधील कार्यरत डॉक्टर व इतर कर्मचारी नेहमीच गैरहजर राहत असल्याने रुग्णांची गैरसोय होत असल्याच्या अनेक तक्रारी केल्या जात होत्या, तर आज या रुग्णालयात काही रुग्ण उपचारासाठी गेले असता, रुग्णालयात एकही डॉक्टर किंवा कर्मचारी उपस्थित नसल्याने आरोग्य विभागाचा भोंगळ कारभार उघड झाला आहे.

कोरोनाचे सावट कमी झाले असले तरी देखील कोरोना पूर्णपणे हद्दपार झालेला नाही, आणि आता संपूर्ण जिल्ह्यात व्हायरल फ्लू सह इतर आजाराने नागरिक ग्रस्त असून, सर्वच शासकीय व खाजगी रुग्णालय गच्च भरलेले दिसत आहेत.

मात्र दुसरीकडे जलंब येथील प्राथमिक आरोग्य केंद्रातील या दांडीबहाद्दर कर्मचाऱ्यांमुळे आरोग्य विभागाची लक्तरे वेशीला टांगली गेली आहेत, त्यामुळे रुग्णांची गैरसोय करणाऱ्या या सर्व डॉक्टर व कर्मचाऱ्यांवर कारवाईची मागणी केली जात आहे.

Edited By: Pravin Dhamale