Gujarat Leopard : सावधान! महाराष्ट्रात गुजरातच्या बिबट्यांचा शिरकाव? नागरिकांमध्ये भीतीचे वातावरण

सागर निकवाडे, साम टीव्ही, प्रतिनिधी

Gujarat Leopard : गुजरातने महाराष्ट्राच्या हद्दीत बिबट्या सोडल्याचा प्रयत्न केल्याची धक्कादायक माहिती समोर आली आहे. राज्य सरकारकडून परवानगी न घेता गुजरात वनविभागाने त्यांच्या राज्यात जेरबंद केलेले बिबटे महाराष्ट्रात सोडण्याचा प्रयत्न केला. यासाठी गुजरातच्या वनविभागाने विनापरवानगी महाराष्ट्र शासनाची बोट वापरली.

नर्मदा विकास विभागाने या संदर्भात माहिती दिली आहे. गुजरात वनविभाग नेहमीच महाराष्ट्र शासनाची विनापरवानगी बोट वापरत असल्याची माहिती नर्मदा विकास विभागाने म्हटले आहे. परवानगी नसताना ही बोट गुजरातने कशी वापरली असा सवाल ग्रामस्थांनी विचारला आहे. याप्रकरणी नंदुरबार वनविभागाने प्रतिक्रिया देणे टाळले आहे.

गुजरात वनविभाग महाराष्ट्राच्या हद्दीत नर्मदा काठावर बिबट्यांसह मगरीसुद्धा सोडत असल्याचा आरोप सामाजिक कार्यकर्त्यांनी केला आहे. बिबट्या आणि मगरींमुळे नर्मदा काठावरच्या आदिवासी बांधवांना धोका असल्याचे त्यांनी म्हटले आहे. या घटनेला पाच दिवस झाले तरी नंदुरबार वनविभागाच्या वतीने कोणताही प्रतिसाद न आल्याचे त्यांनी सांगितले आहे.

या संदर्भात नर्मदा बचाव आंदोलनाच्या कार्यकर्त्या लतिका राजपूत यांनी प्रतिक्रिया दिली आहे. बिबट्या, मगरी सोडून गुजरात आणि महाराष्ट्र राज्य सरकार आदिवासी बांधवांच्या जीवाशी खेळत असल्याचा आरोप त्यांनी केला आहे. या प्रकाराला स्थानिकांकडून प्रचंड विरोध होत आहे.