Dhule News : धुळ्यात दोन दारू दुकान मालकांवर गुन्हा दाखल; अल्पवयीन मुलांना दारू विक्री

धुळे : पुणे ड्रंक अँड ड्राईव्ह प्रकरणाची धुळ्यात देखील अल्पवयीन मुलांना दारू विक्री करणाऱ्या दुकान मालकांच्या विरोधामध्ये गांभीर्याने दखल घेण्यात आली आहे. त्यानुसार धुळे शहरामध्ये दोन वाईन शॉपवर पोलीस प्रशासनातर्फे कारवाई करत गुन्हा दाखल करण्यात आला आहे. 

पुण्यात गेल्या काही दिवसांपूर्वी ड्रंक अँड ड्राईव्हच्या झालेल्या घटनेनंतर संपूर्ण राज्यामध्ये एकच खळबळ उडाली आणि या प्रकरणाची पोलीस प्रशासनाने गांभीर्याने दखल घेत आता (Dhule) धुळ्यात देखील १८ वर्षाखालील अल्पवयीन ग्राहकास दारू विक्री करणाऱ्या दारू दुकानांवर आता पोलीस प्रशासनाची करडी नजर असणार आहे. धुळे पोलीस (Dhule Police) प्रशासनातर्फे आता १८ वर्षाखालील अल्पवयीन मुलांना दारू विक्री करणाऱ्या वाईन शॉपवर कारवाईचा बडगा उगारण्यात आला आहे.   

धुळे शहरातील आझाद नगर पोलिसांनी (Police) व देवपूर पोलिसांनी दोन वाईन शॉप दुकानावर अचानकपणे धाड टाकून त्याठिकाणी अठरा वर्षांच्या खालील अल्पवयीन मुलांना दारू विक्री करणाऱ्या दुकान मालकांना ताब्यात घेतले आहे. त्यांच्या विरोधामध्ये अल्पवयीन न्याय महाराष्ट्र दारूबंदी अधिनियम कायद्या अन्वये गुन्हा देखील दाखल करण्यात आला आहे. तसेच या दोन्ही वाईन शॉपचे परवाने रद्द करण्याची मागणी देखील पोलीस प्रशासनातर्फे करण्यात आली आहे. यामुळे आता दारू घेण्यासाठी आलेला ग्राहक हा अल्पवयीन तर नाही ना याची खातरजमा करूनच दारूची विक्री दुकान मालकाला करावी लागणार आहे.