Shirpur : सुरुंग फुटून अंगावर पडला दगड; शिरपूर तालुक्यातील जवानाला लद्दाख येथे वीरमरण

धुळे : रस्त्याच्या कामासाठी दगड फोडण्यासाठी सुरुंग लावण्यात आला होता. हा सुरुंग फुटून उडालेला दगड याठिकाणी कर्तव्य बजावत असलेल्या भारतीय सैन्य दलातील जवानाच्या अंगावर पडला. यात देशसेवेत कर्तव्य बजावत असताना शिरपूर तालुक्यातील शेमल्या येथील जवानाचा मृत्यू झाल्याची घटना लद्दाख येथे घडली आहे. घटनेची माहिती मिळताच कुटुंबावर दुःखाचा डोंगर कोसळला आहे. 

धुळ्याच्या शिरपूर तालुक्यातील शेमल्या येथील जवान दिनेश तुफान पावरा (वय ३०) असे वीरमरण प्राप्त झालेल्या जवानाचे नाव आहे. भारतीय सैन्य दलाच्या बॉर्डर रोड ऑर्गनायझेशनमध्ये ते कार्यरत होते. दरम्यान लद्दाख येथे कर्तव्य बजावत असताना सदरची दुर्दैवी घटना घडली आहे. यात लद्दाख येथे रस्त्याच्या काम सुरु असल्याने त्याठिकाणी दगड फोडण्यासाठी ठिकठिकाणी सुरुंग लावण्यात आलेले होते.  

दोन वर्षांपूर्वीच अग्निवीर म्हणून सैन्यात  

दिनेश पावरा या जवानाने देशसेवा हीच मोठी सेवा मानत दोन वर्षांपूर्वीच भारतीय लष्करात अग्निवीर म्हणून सामील झाला होता. लडाख मध्ये भारतीय सैन्य दलाच्या बॉर्डर रोड ऑर्गनायझेशनमध्ये कार्यरत असताना वीरमरण प्राप्त झाले आहे. दरम्यान त्यांच्या मृत्यूची बातमी समजताच शेमल्या गावासह संपूर्ण तालुक्यात शोककळा पसरली असून, कुटुंबीयांवर दुःखाचा डोंगर कोसळला आहे.

गावी होणार अंत्यसंस्कार 

दरम्यान सुरुंग लावला असताना तो फुटला. यामुळे उडालेला दगड अंगावर पडल्याने दिनेश पावरा यांचा मृत्यू झाल्याची प्राथमिक माहिती मिळाली. आज दुपारनंतर त्याचे पार्थिव अंत्यसंस्कार करण्यासाठी गावी आणले जाणार असल्याचे सांगण्यात येत आहे. यानंतर शासकीय इतमामात त्यांच्यावर अंत्यसंस्कार करण्यात येणार आहेत. त्यांच्या मागे पत्नी, मुलगी, आई, वडील, तीन भाऊ असा परिवार आहे.