महिलांचे पारंपारिक अहिराणी गीते गात वरुण देवतेला आळवणी

धुळे : खानदेशात यंदा पावसाची कृपादृष्‍टी राहिलेली नाही. शेतकरी हवालदील झाला आहे. पिके संकटात असून पाऊस लांबला तर पिकांचे नुकसान होईल. यामुळे वरुण देवतेला प्रसन्‍न करण्यासाठी महिला वर्गाने अहिराणी गीत गावून साकळे घातले. (dhule-news-no-rain-droped-women-ahirani-song-singing-and-come-rain-in-kapdane-village)

ऑगस्ट महिना सुरू झाला तरीदेखील अद्याप धुळे जिल्ह्यामध्ये समाधानकारक पाऊस पडलेला नाही. त्यामुळेच शेतकऱ्यांसह नागरिकांसमोर पिण्याचा पाण्याचा देखील मोठा प्रश्न उभा ठाकला आहे. त्यामुळेच वरुण राजाला आवळणी करण्यासाठी धुळे तालुक्यातील कापडणे शिवारातील महिलांनी अहिराणी भाषेत गाणे म्हणत वरुणराजाला आवळणी करण्याचा प्रयत्न केला आहे.

पावसाला उशीर झाला की डोक्यावर घागर तसेच निंबाचा पाला घेऊन खानदेश भागांमध्ये धोंड्या धोंड्या पाणी दे अशा पद्धतीचा उपक्रम राबवून वरुणराजाला प्रसन्न करण्याचा प्रयत्न करण्याची प्रथा आहे. तसाच काहीसा प्रयत्न या महिला वर्गातर्फे खानदेशी भाषेत गाणी म्हणत डोक्यावर घागर व निंबाचा पाला घेऊन वरुणराजाला प्रसन्न करण्याचा प्रयत्न केला आहे. अशा पद्धतीने वरुण राजाला आवळणी केल्यानंतर पावसाला सुरुवात होते. अशी धारणा खान्देश वासियांची असल्यामुळे या महिलांकडून हा प्रयत्न करण्यात आला आहे.