Tuljabhavani Mandir : तुळजाभवानी देवीचे सशुल्क दर्शन पास आता ऑनलाईन; २२ जुलैपासुन मोबाईल ऍप होणार सुरू

बालाजी सुरवसे 
धाराशिव : महाराष्ट्राची कुलस्वामिनी आई तुळजाभवानी मातेचे दर्शन घेण्यासाठी सशुल्क स्पेशल दर्शन पास मिळत असते. मात्र आता भाविकांना हि पास काढण्यासाठी रांगेत उभे राहण्याची गरज नसून मोबाईलवरून ऑनलाईन पद्धतीने हि पास भाविकांना काढता येणार आहे. यासाठी मंदिर समितीने ऍप काढले आहे. 

महाराष्ट्राची कुळस्वमिनी (Tuljabhavani Mandir) तुळजाभवानी मातेचे दर्शन घेण्यासाठी भाविक मोठ्या संख्येने येत असतात. दर्शन घेण्यासाठी बराच वेळ भाविकांना रांगेत उभे राहावे लागत असते. मात्र झटपट दर्शन घेण्यासाठी मंदिर समितीने दर्शन पासची सुविधा सुरु केली आहे. मंदिर परिसरातच हि पास भाविकांना ऑफलाईन पद्धतीने उपलब्ध होत असते. मात्र आता भाविकांच्या सोयीसाठी ऑनलाईन पद्धतीने देखील भाविकांना पास काढता येणार आहे. यासाठी तुळजाभवानी मंदीर संस्थाने (Dharashiv News) एक ऍप तयार केले आहे.

२२ जुलैपासून सुरु होणार ऍप 

तुळजाभवानी मंदीर संस्थानचे अध्यक्ष तथा जिल्हाधिकारी डॉ. सचिन ओम्बासे यांनी भाविकांच्या सोयीसाठी हा निर्णय घेतला आहे. यामुळे घरबसल्या सशुल्क पास ५०० रुपये देणगी देऊन काढता येणार आहे. सशुल्क स्पेशल दर्शन पास हे मंदीर संस्थानच्या प्रशासकीय इमारतीत ऑफलाईन पद्धतीने थेट जाऊन काढता येणार आहे. त्याचं बरोबर आता ही सुविधा ऑनलाईन देखील उपलब्ध असणार आहे. २२ जुलै सोमवारपासुन ऑनलाईन सुविधा मोबाईल ऍपवर सुरु होणार आहे.