Dharashiv News : आश्रम शाळा शिक्षक, कर्मचाऱ्यांचे जागरण गोंधळ आंदोलन; भविष्य निर्वाह निधी प्रस्ताव मंजूर करण्याची मागणी

बालाजी सुरवसे 
धाराशिव : आश्रम शाळांमधील शिक्षकांचा भविष्य निर्वाह निधीसाठीचा प्रस्ताव शासनाकडे पाठविण्यात आला आहे. मात्र हा प्रस्ताव अदयाप प्रलंबित असून त्याला मंजूरी मिळावी; यासह विविध मागण्यांसाठीआश्रम शाळा शिक्षक व कर्मचाऱ्यांनी आंदोलन छेडले आहे. धाराशिवच्या जिल्हाधिकारी कार्यालयासमोर हे आंदोलन करण्यात येत असून सरकारच्या विरोधात जागरण गोंधळ आंदोलन झाले. 

मुख्यमंत्री एकनाथ शिंदे (eknath Shinde) यांच्यासह दोन्ही उपमुख्यमंत्र्यांच्या व जिल्हा प्रशासनाच्या नावाने जागरण गोंधळ घालत आश्रम शाळांच्या शिक्षकांच्या वतीने धाराशिव जिल्हाधिकारी कार्यालयासमोर आंदोलन करण्यात आले. धाराशिव जिल्ह्यातील आश्रम शाळा शिक्षक व शिक्षकेतर कर्मचारी यांचा एक वर्षांपासून प्रलंबित असलेला भविष्य निर्वाह निधीचा प्रस्ताव मंजूर करावा. यासह (Ashram School Teacher) आश्रम शाळेतील शिक्षक व शिक्षकेतर कर्मचाऱ्यांचे वेतन हे दरमहा एक तारखेला मिळाले पाहिजे या मागणीसाठी हे आंदोलन करण्यात आले आहे. 

प्रलंबित प्रश्न तात्काळ सोडवा 

आश्रम शाळा शिक्षकांच्यावतीने महाराष्ट्राचे मुख्यमंत्री, उपमुख्यमंत्री व जिल्ह्यातील लोकप्रतिनिधींनी आमच्या मागणीकडे लक्ष देऊन तात्काळ प्रश्न सोडवावेत अशी मागणी केली आहे. शिक्षकांना भविष्य निर्वाह निधीचा लाभ होण्यासाठी प्रस्तावाला प्रामुख्याने मंजुरी देण्याची मागणी केली आहे.