Dharashiv News : धाराशिवमधील रुग्णसेवा सोमवारपासून कोलमडणार? डॉक्टर संघटनेकडून कामबंदचा इशारा

बालाजी सुरवासे, धाराशिव

Dharashiv Doctors call Strike News : धाराशिव जिल्ह्यातील रुग्णसेवा सोमवारपासून कोलमडण्याची शक्यता आहे. तेरखेडा प्राथमिक आरोग्य केंद्रातील वैद्यकीय अधिकाऱ्याला झालेल्या मारहाणीनंतर जिल्ह्यातील डॉक्टर संघटना आक्रमक झाली आहे. मारहाण करणाऱ्या ग्रामस्थांवर कारवाई न झाल्यास कामबंद आंदोलन करण्यात येईल असा इशारा दिला आहे.  (Latest Marathi News)

धाराशिव जिल्ह्यातील तेरखेडा येथील प्राथमिक आरोग्य केंद्रात एका वैद्यकीय अधिकाऱ्याला ग्रामस्थांकडून मारहाण झाली होती. त्यामुळे जिल्ह्यातील डॉक्टर संघटना आक्रमक झाली आहे. संघटनेने या घटनेचा निषेध नोंदवला आहे. संबंधितांवर अटकेची कारवाई झाली नाही तर, सोमवारपासून कामबंद आंदोलन करण्यात येईल, असा इशारा संघटनेकडून देण्यात आला आहे.

डॉक्टरांच्या संघटनेने यासंदर्भात जिल्हाधिकारी आणि जिल्हा वैद्यकीय अधिकारी यांना निवेदन दिले आहे. यावेळी संघटनेतील सदस्यांनी या घटनेचा निषेध नोंदवला. तसेच निषेधाच्या घोषणा दिल्या. वैद्यकीय अधिकाऱ्यांना मारहाण करणाऱ्या ग्रामस्थांवर कारवाई न झाल्यास कामबंद आंदोलन करण्यात येईल, असा इशारा त्यांनी दिला.

मारहाण करणाऱ्यांवर गुन्हा, पोलीस तपास सुरू

तेरखेडा येथील प्राथमिक आरोग्य केंद्रात ही घटना घडली होती. वैद्यकीय अधिकारी नवनाथ घुले यांना ग्रामस्थांनी मारहाण केली होती. हाताला लागले आहे, पट्टी बदलायची. तू इथे का नव्हतास असं म्हणत त्यांनी घुले यांच्याशी हुज्जत घातली. त्यानंतर त्यांना मारहाण केली. या प्रकरणी आरोपी सचिन उकरांडे, धनंजय मस्के, बाळू पौळ यांच्या विरोधात येरमाळा पोलीस ठाण्यात गुन्हा दाखल करण्यात आला आहे. पोलीस या घटनेचा तपास करत आहेत.