Devendra Fadnavis News: औरंगजेबाची भलामण करणाऱ्यांना माफी नाही; देवेंद्र फडणवीस यांच्या गृहविभागाला महत्वाच्या सूचना

रुपाली बडवे

Kolhapur News: कोल्हापुरात काही तरुणांनी आक्षेपार्ह व्हाट्सअॅप स्टेटस ठेवण्यावरून नव्या वादाला तोंड फुटलं आहे. या प्रकारावरून कोल्हापुरात दोन गटांमधील वाद विकोपाला गेला आहे. कोल्हापुरात या वादानंतर मोठ्या संख्याने जमाव रस्त्यावर उतरल्याने एका गटाचं आंदोलन चिघळलं आहे. कोल्हापुरातील परिस्थितीवर उपमुख्यमंत्री देवेंद्र फडणवीस यांनी मोठं भाष्य केलं आहे.

'औरंगजेबाची भलामण करणाऱ्यांना माफी नाही, असं म्हणत देवेंद्र फडणवीसांनी गृहविभागाला महत्वाच्या सूचना दिल्या आहेत. (Latest Marathi News)

आक्षेपार्ह व्हाट्सअॅप स्टेटसवरून शहरात एका गटाने मोर्चा काढला. या मोर्चात मोठ्या संख्येने जमाव रस्त्यावर उतरल्याने आंदोलनाला गालबोट लागलं आहे. काही ठिकाणी दगडफेकीच्या देखील घटना घडल्या आहेत. अशा जमावाला पांगविण्यासाठी पोलिसांकडून आंदोलकांवर लाठीचार्ज केला.

कोल्हापूरची परिस्थिती नियंत्रणात आणण्यासाठी गृहमंत्री देवेंद्र फडणवीस यांनी पोलिसांना कठोर कारवाई करण्याच्या सूचना दिल्या आहेत. (Maharashtra Latest News)

देवेंद्र फडणवीस म्हणाले, ' औरंगजेबाची भलामण करणाऱ्यांना महाराष्ट्रात माफी नाहीच. पोलिस सुद्धा कारवाई करतच आहे. त्याचवेळी जनतेने सुद्धा शांतता पाळावी. कुठेही अनुचित प्रकार घडणार नाही. ही आपल्या सर्वांची सामूहिक जबाबदारी आहे'. दोषींवर कठोर कारवाई करण्याच्या सूचना उपमुख्यमंत्री देवेंद्र फडणवीस (Devendra Fadnavis) यांनी गृहविभागाला दिलेल्या आहेत.

कोल्हापुरात नेमकं काय घडलं ?

कोल्हापुरात काही युवकांनी वादग्रस्त स्टेटस ठेवले. त्यामुळे तणाव निर्माण झाला. त्यातून दोन गट आमने-सामने आले. शहरातील दसरा चौक टाऊन हॉल आणि लक्ष्मीपुरी परिसरात दगडफेक झाल्याच्या घटना देखील घडल्या.

परिणामी कायदा व सुरक्षा अबाधित राहावी यासाठी पाोलिसांची मोठी यंत्रणा घटनास्थळी दाखल झाली. मात्र परिस्थिती चिघळल्याने पोलिसांकडून लाठीचार्ज करण्यात आला. कोल्हापुरातील परिस्थितीवरून देवेंद्र फडणवीस यांच्या गृहविभागाला महत्वाच्या सूचना दिल्या आहेत.