Gondia News : गोंदियातील ऑनलाईन जुगार प्रकरणात दाऊद कनेक्शनमुळे खळबळ, आरोपीविरोधात लूकआऊट नोटीस जारी

Nagpur News : भारतात सुरु असलेल्या ॲानलाईन जुगाराचा दाऊद टोळीशी संबंध असल्याची धक्कादायक माहिती समोर आली आहे. गोंदिया येथील फरार आरोपी सोंटू जैन याला दाऊद टोळीचा हस्तक नावेद मदत करत असल्याची उघड झाल्याने एकच खळबळ उडाली आहे.

गोंदिया येथील बुकी आणि ॲानलाईन जुगारातील आरोपी सोंटू जैन याच्यावर गुन्हा दाखल झाल्यानंतर विदर्भातील ॲानलाईन जुगाराचे जाळे उघड झाले आहे. दाऊदचा हस्तक नावेद ५ वर्षांपासून ॲानलाईन जुगाराची टोळी चालवतो. (Crime News)

नावेदने सॅाफ्टवेअर कंपनी स्थापन केली असून तो ॲानलाईन गेमिंग सॅाफ्टवेअरचा पुरवठा करत असल्याची माहिती देखील समोर आली आहे. ॲानलाईन जुगार प्रकरणात फरार आरोपी सोंटू जैन याने ५८ कोटींची फसवणूक केली होती. या तपासातून दाऊद कनेक्शनाचे धागेदोरे सापडले आहेत.  (Latest Marathi News)

फरार आरोपी सोंटू नवरतन जैन याच्याकडे देश विदेशात १२ ठिकाणी ८०० कोटींची मालमत्ता आहे. सोंटूचे १४ बॅंक खाते, चार लॅाकर पोलिसांनी गोठवले आहेत. सोंटू विरुद्ध लूकआऊट नोटीस देखील जारी करण्यात आली आहे.

गुन्हा दाखल होण्याची कुणकुण लागताच आरोपी सोंटू दुबईला फरार झाल्याची माहिती मिळत आहे. आरोपीला अटक करण्यासाठी पोलिसांनी आता प्रयत्न सुरु केले आहेत.